ՀՀ զինված ուժերում 2011 թվականի ընթացքում արձանագրվել է մահվան ելքով դեպքերի կտրուկ նվազում. լրագրողների հետ հանդիպմանն այս մասին տեղեկացրեց ՀՀ զինվորական դատախազ Գևորգ Կոստանյանը:
Զինդատախազը ներկայացրեց 2011 թվականին ՀՀ զինված ուժերում արձանագրված դեպքերի ամփոփ տվյալները: Մասնավորապես` զինդատախազի խոսքով՝ ՀՀ զինված ուժերում արձանագրված, զինվորական ծառայություն անցնելու հետ կապված մահվան ելքով դեպքերը 2011 թվականին նվազել են մոտ 33,3 տոկոսով: Եթե 2010 թվականին արձանագրվել է զինվորական ծառայություն անցնելու հետ կապված մահվան 54 դեպք, նախորդ տարի գրանցվել է 36 դեպք (որից 30-ը հանցագործության հետևանքով, այդ թվում՝ 10-ը հակառակորդի կողմից կատարված): Իսկ 2010 թվականին արձանագրված սպանության 17 դեպքի փոխարեն 2011 թվականին գրանցվել է ծառայություն անցնելու հետ կապված սպանության 2 դեպք: Ըստ զինդատախազի` այս ցուցանիշը նվազել է շուրջ 88,8 տոկոսով:
«Իհարկե, անգամ մեկ մահվան դեպքը զինված ուժերում խիստ մտահոգիչ է, և մարդու կյանքի մասին թվային կամ տոկոսային վերլուծությամբ գնահատականները տալը գուցե և այնքան էլ ընդունելի չէ, սակայն այնուամենայնիվ ակնհայտ է, որ մահվան ելքով դեպքերը զինված ուժերում ակնհայտորեն նվազել են»,- ասաց զինդատախազ Կոստանյանը` ընդծելով, որ 2011 թվականի ընթացքում ՀՀ զինված ուժերում արձանագրված ընդհանուր հանցագործությունները 2010 թվականի համեմատ նվազել են շուրջ 10%-ով:
Հանցագործությունների թվի նվազումը Գևորգ Կոստանյանը ուղղակիորեն պայմանավորեց ՀՀ զինվորական դատախազության և ՀՀ ՊՆ կողմից իրականացված համակարգային բնույթի հետևողական աշխատանքով, որոնք իրենց հիմքում ունեն օրենքի առջև բոլորի հավասարություն, ցանկացած իավախախտման, այդ թվում` հանցագործության նկատմամբ անհանդուրժողականության և անպատժելիության մթնոլորտի բացառման սկզբունքները:
Զինդատախազը նաև նշեց, որ ի տարբերություն նախորդ տարիների` կրկնակի աճել է պետությանը պատճառված վնասի վերականգնամն ցուցանիշը: Եթե 2010 թվականին պետության շահերի պաշտպանության նպատակներով կատարվել է 301 ուսումնասիրություն, և պետությանը պատճառված վնասից վերականգնվել է 430 մլն 266 հազար դրամ, ապա 2011 թվականին զինդատախազությունը կատարել է 591 ուսումնասիրություն, որի արդյուքնում վերականգնված վնասը կազմել է 333 մլն 895 հազար դրամ: