Վրաստանի նախագահ Միխեիլ Սաակաշվիլին ադրբեջանական ANS հեռուստաալիքին տված հարցազրույցում անդրադարձել է Ադրբեջանի հետ հարաբերություններին և իր վերաբերմունքն է արտահայտել է Ադրբեջանի նախագահ Իլհամ Ալիևի հանդեպ,- հայտնում է Vesti.az-ը:
«Երբ ես առաջին անգամ հանդիպեցի Իլհամ Ալիևին, նա նոր էր դարձել Ադրբեջանի նախագահ, նկատեցի, որ ձևական կարևորության հետք անգամ չկա: Նա պարզապես հաճելի, նորմալ մարդ էր, որի հետ կուզենայիր ընկերանալ: Իհարկե, ով էլ լիներ, մենք կփորձեինք հարաբերություններ կարգավորել, բայց երբ չկա նման լարվածություն, և ամեն ինչ անմիջական է` ավելի լավ: Հենց այդպես էլ եղավ»,- ասել է Սաակաշվիլին:
Վրաստանի նախագահի խոսքով` Ադրբեջանի նախագահը բավական ներդաշնակ անձնավորություն է. «Իլհամ Ալիևը հազար անգամ ավելի մարդ է, քան քաղաքական գործիչ»: Անդրադառնալով երկկողմ հարաբերություններին՝ Վրաստանի նախագահը նշել է, որ Վրաստանն Ադրբեջանի հետ ունի բարիդրացիական և ամուր կապեր: Տարածաշրջանում ոչինչ հենց այնպես չպետք է լինի: Եթե դիտարկենք շատ երկրներ,- ես չեմ ցանկանում հիմա կոնկրետ նշել,- տեսնում ես, որ հարևանի հետ ունես ընդհանուր շահեր, որոնց կարող ես հասնել երկկողմ հարաբերություններում, բայց առաջնորդների անձնական ամբիցիաների պատճառով հարաբերությունները ոչ մի կերպ չեն ստացվում: Նման դեպքերը շատ են: Սա ուղղակի թշնամական վերաբերմունք է»,- ասել է Սաակաշվիլին:
