Թուրքական Doğan լրատվական գործակալության փոխանցմամբ՝ Ֆրանսիայում Թուրքիայի դեսպան Թահսին Բուրջուօղլուն անդրադարձել է հունվարի 23-ին Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի դիտարկմանը.
«Մենք գոհ ենք Ֆրանսիայի Սենատի Սահմանադրական հանձնաժողովի կայացրած երեկվա որոշումից, որով այդ օրինագիծը ճանաչվեց հակասահմանադրական։ Հուսով ենք, որ նույնպիսի առողջ մտածելակերպ կցուցաբերեն նաև Սենատի անդամները և դեմ կքվեարկեն այդ օրինագծին։ Հուսով ենք, որ Ֆրանսիան անիմաստ քայլերից կփրկի իրեն և անգամ Հայաստանին։
Մենք մինչև երկուշաբթի երեկո ժամանակ ունենք։ Այդ ընթացքում շարունակելու ենք սենատորների հետ մեր շփումները։ Մենք աշխատում ենք շաբաթը 7 օր, օրական 24 ժամ»։
Հիշեցնենք, որ երեկ Ֆրանսիայի Սենատի Սահմանադրական հանձնաժողովը փոփոխություններ է մտցրել նախորդ տարվա դեկտեմբերի 22-ին Ազգային ժողովի կողմից ընդունված Հայոց ցեղասպանության հերքումը քրեականացնող օրինագծում։ Սակայն այդ ուղղումները դեռ պետք է հաստատվեն Սենատի լիագումար նիստում։ Արդյունքում՝ օրինագիծը կարող է հանվել Սենատի օրակարգից, ինչպես որ տեղի ունեցավ 2011 թվականի մայիսի 4-ին։
