Ռուսական ВЗГЛЯД թերթի փոխանցմամբ՝ վրացական ընդդիմադիր Հանրապետական կուսակցության առաջնորդ Պաատա Զաքարեիշվիլին «Ռեզոնանսի» թերթին տված հարցազրույցի ժամանակ անդրադարձել է հունվարի 30-ին Վաշինգտոնում կայանալիք ԱՄՆ-ի և Վրաստանի նախագահներ Բարաք Օբամայի ու Միխեիլ Սաակաշվիլիի հանդիպմանը։
Այդ կապակցությամբ Զաքարեիշվիլին թվարկել է 4 պատճառ, թե ինչու է Օբաման որոշել հունվարի 30-ին հյուրընկալել Սաակաշվիլիին.
«ԱՄՆ նախագահը չի ցանկանում զենք վաճառել Վրաստանին, ինչի համար էլ ցանկանում է այդ հարցը լուծել «Սաակաշվիլիի հետ մեկ լուսանկարով»՝ քաջ գիտակցելով, որ Վրաստանի նախագահի համար Բարաք Օբամայի հետ լուսանկարվելը շատ ավելի կարևոր է, քան երկրի շահերը։
Բացի այդ, հանդիպմամբ Օբաման նաև չեզոքացնում է ԱՄՆ-ում հանրապետականների այն հնարավոր ագրեսիվ հայտարարությունները՝ թե դեմոկրատները հեռացել են իրենց հավատարիմ դաշնակից Վրաստանից, որոնք կարող են հնչել նախընտրական կամպանիայի ժամանակ։
Երրորդ պատճառն Իրանն է։ Հանուն Օբամայի հետ լուսանկարվելու՝ Սաակաշվիլին պատրաստ է անտեսել Վրաստանի շահերն ու հեռանկարները և ծառայել ԱՄՆ-ին՝ ընդդեմ Իրանի։ Մինչդեռ Վրաստանին անհրաժեշտ է հեռանկարում լավ հարաբերություններ պահպանել Իրանի հետ։ Օբամաներն ու Սաակաշվիլիները գալիս են ու գնում, իսկ Վրաստանն ու Իրանը՝ մնում։
Չորրորդ պատճառն այս տարի Վրաստանում տեղի ունենալիք խորհրդարանական ընտրություններն են և հաջորդ տարվա նախագահական ընտրությունները։ Այդ հանդիպումը վկայում է ոչ թե վրացական իշխանությունների, այլ վրաց ժողովրդի նկատմամբ ԱՄՆ-ի տածած հարգանքի մասին»։
Հիշեցնենք, որ երեկ Վրաստանում ԱՄՆ դեսպան Ջոն Բասսը, անդրադառնալով Օբամա-Սաակաշվիլի առաջիկա հանդիպմանը, հայտարարել էր, որ այդ հանդիպումը վկայում է ԱՄՆ-ի համար Վրաստանի մեծ կարևորության մասին։
