Մոսկվայի Խամովնիչեսկի դատարանը մեղավոր է ճանաչել Միխայիլ Խոդորկովսկուն և Պլատոն Լեբեդևին: Ըստ քրեական գործի` Խոդորկովսկին և Լեբեդևը, ղեկավարելով «Յուկոս» նավթային ընկերությունը, մի քանի հարյուր միլիոն տոննա նավթ են թաքցրել պետությունից` դրա դիմաց չվճարելով հարկերը:
Սպասվում է, որ մեղադրականի հրապարակումը կտևի մի քանի օր, հնարավոր է, որ այն հետաձգվի, և հրապարակումը ավարտվի Նոր տարում:
Այսօր դատավարության հրապարակման ժամանակ դադարեցվել է ուղիղ հեռարձակումն այն լրագրողների համար, որոնք գտնվել են լրագրողների համար հատուկ կահավորված դահլիճում:
Դատարանի շենքի դիմաց այս պահին հավաքվել է ավելի քան 150 լրագրող:
Միխայիլ Խոդորկովսկու և Պլատոն Լեբեդևի պաշտպանները արդեն իսկ հանդես են եկել դատարանի վճիռը բողոքարկելու պատրաստակամությամբ,- հայտարարել է Խոդորկովսկու փաստաբան Կարինա Մոսկալենկոն: Հարցին, թե կարելի՞ է ենթադրել, որ դատավճիռը կբողոքարկվի, փաստաբանը դրական է պատասխան:
Նշենք նաև, որ դատարանի շենքի մոտից ոստիկանությունը բերման է ենթարկել մոտ 20 մարդու: Հայտնի է դարձել, որ մարդիկ այստեղ են հավաքվել ի պաշտպանություն Խոդորկովսկու պաստառներով: Ոստիկանությունը պահանջել է նրանցից իջեցնել պաստառները, և չենթարկվելուց հետո նրանց բերման են ենթարկել: