Կանխամտածված սնանկության դեպքերը ներկայումս մեծ թիվ են կազմում հանրապետությունում: Իրավաբանական անձինք, ովքեր պետությանը խոշոր գումարներ են պարտք, ուղղորդում են իրենց գործերն այնպես, որ դրանք գնան սնանկության, իրենք իրենց պարտավորությունները չկատարեն: Ամփոփելով անցած 2011 թվականը՝ լրագրողների հետ հանդիպմանն այսօր այս մասին հայտնեց ԴԱՀԿ ծառայության պետ Միհրան Պողոսյանը:
2011 թվականը նա բնորոշեց որպես ծանր տարի, ինչը պայմանավորեց նաև բռնագանձումների ծավալով: Եթե 2009 թվականին 6 մլրդ դրամի բռնագանձում է եղել, ապա այսօր դա ավելի քան կրկնապատկվել է, 2011 թվականը ԴԱՀԿ-ն ամփոփում է 4 մլրդ դրամի շեմը հատած: Գլխավոր հարկադիր կատարողը սա պայմանավորեց ծառայության աշխատանքի արդյունավետության բարձրացմամբ:
Հարկադիր կատարման ծառայությունում ներկայումս բավական մեծ ծավալ են կազմում ինչպես պետավտոտեսչության, այնպես էլ բջջային օպերատորների մասով եղած գործերը, սակայն հայցի ապահովման փուլում պահանջատիրոջ կողմից գումարի վճարման դեպքերը տոկոսային հարաբերությամբ աճել են:
Ինչ վերաբերում է ԴԱՀԿ ծառայության կողմից ՀՀ գլխավոր դատախազությանն ուղարկված գործերին` 2010 թվականին ԴԱՀԿ ծառայությունը գլխավոր դատախազություն է ուղարկել 21 գործ, որից 11-ը քրեական գործեր են եղել, 2011-ին 35 դատական գործ է ուղարկվել դատախազություն, որից 17-ը` քրեական գործեր: Նշված 17 քրեական գործերից միայն 10-ը կանխամտածված սնանկության մասով են, ինչը, ԴԱՀԿ ծառայության պետի կարծիքով, բավական լուրջ ցուցանիշ է:
2011 թ. բռնագանձումների և վերականգնումների ծավալը գերազանցել է 14 մլրդ դրամի սահմանագիծը, հարուցվել է 91.604 կատարողական վարույթ՝ նախորդ տարվա 83.310-ի դիմաց, աճը կազմել է 110%…
Հարուցված կատարողական վարույթներով հաշվետու տարում պահանջատերերի օգտին բռնագանձվել և վերականգնվել է 14.282.842.296 դրամ, նախորդ տարվա համեմատ բռնագանձված և վերականգնված 11.262.915.863 դրամ գումարի դիմաց… Աճը կազմել է 127 տոկոս, այդ թվում՝ պետական բյուջեի օգտին 2.388.154.593 դրամ, նախորդ տարվա 1.727.849.463 դրամ գումարի դիմաց, աճը կազմել է 138%, իրավաբանական անձանց օգտին՝ 7.803.317.338 դրամ, նախորդ տարվա 6.194.112.111 դրամ գումարի դիմաց, աճը՝ 126 %, ֆիզիկական անձանց օգտին՝ 1.582.672.582 դրամ, նախորդ տարվա 1.388.066.934 դրամ գումարի դիմաց, աճը կազմել է 114%: Ոչ գույքային բնույթի կատարողական վարույթներով հարուցվել և ընթացք է տրվել 19.016 վարույթ, նախորդ տարվա 19.510 վարույթների փոխարեն: Ավարտված և կարճված կատարողական վարույթների քանակը հաշվետու տարում կազմել է 104.108, նախորդ տարվա՝ 68.258-ի փոխարեն, աճը կազմել է 153%…