Արժույթի միջազգային հիմնադրամը (ԱՄՀ) անդամ երկրներին առաջարկելու է մեծացնել կազմակերպության վարկային ռեսուրսները մեկ տրիլիոն դոլարով: Ինչպես հայտնում է Bloomberg-ը, վկայակոչելով G20-ի երկրներից մեկի պաշտոնական ներկայացուցչին, Եվրոպայում պարտքային ճգնաժամի խորացման դեպքում դրամական այդ միջոցներն ուղղվելու են համաշխարհային ֆինանսական համակարգի կայունության պահպանմանը:
Գործակալության տվյալներով, ԱՄՀ-ն գումար է պահանջելու հիմնականում այն երկրներից, որոնք նավթ են արտահանում, ինչպես նաև զարգացող խոշոր երկրներից` Չինաստանից, Բրազիլիայից, Ռուսաստանից, Հնդկաստանից: Բացի այդ, միջոցների զգալի մասը ԱՄՀ-ն ցանկանում է ստանալ Ճապոնիայից: Սակայն պահուստները մեկ տրիլիոն դոլարով ավելանալու պլանների մասին դեռ պաշտոնապես չի հայտնվել: Սպասվում է, որ այս հարցի շուրջ բանակցությունները կսկսեն փետրվարի վերջին Մեխիկոյում` G20-ի ֆինանսների նախարարների հանդիպման ժամանակ:
G20-ի ֆինանսների նախարարների անցած հանդիպման ժամանակ, որը տեղի էր ունեցել 2011 թվականի նոյեմբերին, պաշտոնյաները հայտարարել էին, որ պատրաստ են ԱՄՀ-ին տրամադրել լրացուցիչ միջոցներ, եթե դրա անհրաժեշտությունն առաջանա:
Չնայած նրան, որ հիմնադրամի ռեսուրսների մեծացման մասին պաշտոնապես չի հայտարարվել, այդ լուրերն արդեն ազդել են շուկաների վրա: Bloomberg-ը նշում է, որ ներդրողները հունվարի 18-ին սկսել են գնել եվրոպական ընկերությունների բաժնետոմսերը:
Այժմ ԱՄՀ հիմնադրամում կա 385 միլիարդ դոլար: Եվրոգոտու երկրները ավելի վաղ հայտարարել էին, որ պատրաստ են հիմնադրամին հատկացնել մինչև 150 միլիարդ եվրո:
ԱՄՀ-ն ճգնաժամի ժամանակ կարիք ունեցող երկրներին տրամադրել էր տասնյակ միլիարդ դոլարի վարկ: Մասնավորապես, ԱՄՀ-ից գումար են ստացել Ուկրաինան, Հունգարիան, Պակիստանը, Թուրքիան և այլ երկրներ: Այժմ հիմնադրամը բանակցություններ է վարում Եգիպտոսին ավելի քան երեք միլիոն դոլար հատկացնելու վերաբերյալ:
