«ՆԻԿՕ» կահույքի սրահի մենեջեր Արման Պետրոսյանը հավաստիացնում է, որ անձամբ ինքը և ՍՊԸ-ի տնօրինությունը տեղյակ չեն՝ ովքե՞ր են եղել նախօրեին սրահի մոտ վիճաբանած և կրակոցներ արձակած մարդիկ կամ ո՞րն է եղել վիճաբանության պատճառը: Այս մասին նա ասաց «Առաջին լրատվական»-ի հետ զրույցում:
«Անկեղծ ասեմ, իրոք ոչ մի բանից տեղյակ չեմ: Ինչ որ Դուք գիտեք, ինչ որ ինտերնետում կա, նույն բանը պետք է Ձեզ ասեմ: Անկեղծ, իրոք տեղյակ չեմ»,- ասաց նա: Հարցին՝ տեղյա՞կ է, թե ինչն է եղել վիճաբանության բուն պատճառը, Արման Պետրոսյանը նշեց. «Անկեղծ եմ ասում, չգիտեմ, ուղղակի կռիվ է եղել, ոչ մեկս էլ ոչ մի բան չգիտենք»:
Նույն «ոչ մի բան չգիտեմ»-ը հնչեց նաև այն հարցին ի պատասխան, թե հնարավո՞ր է, որ կրակոցներ արձակած անձինք անձնական խնդիրներ են ունեցել «ՆԻԿՕ» խանութի սեփականատիրոջ եղբոր որդու հետ, որի հետ էլ նրանք խանութից դուրս վիճաբանել են:
Հիշեցնենք, որ հունվարի 17-ին, ժամը 16.50-ին, «ՆԻԿՕ» ՍՊԸ նախագահը դիմել է ոստիկանության Արաբկիրի բաժին և հայտնել, որ ժամը 16.30-ի սահմաններում մի քանի երիտասարդներ փորձել են մտնել Տիգրանյան փողոցում գտնվող «ՆԻԿՕ» կահույքի սրահ, սակայն ինքը թույլ չի տվել, որից հետո երիտասարդները սրահի դիմաց վիճաբանել են իր եղբորորդու հետ, իսկ 10 րոպե անց հնչել են կրակոցներ, ինչի հետևանքով վնասվել են սրահի պատուհանի ապակիները:
Դեպքի վայր մեկնած օպերատիվ խումբը հայտնաբերել է «ՊՍՄ» ատրճանակի 5.45 մմ տրամաչափի 4 պարկուճ և 2 գնդակ, 9 մմ տրամաչափի գազային ատրճանակի 4 պարկուճ, 9 մմ տրամաչափի գնդակի 1 բեկոր և «Մակարով» ատրճանակի 9 մմ տրամաչափի 3 պարկուճ, իսկ դեպքի վայրից մոտ 70 մ հեռավորության վրա հայտնաբերվել է 12 մմ տրամաչափի որսորդական հրացանի կրակված 4 պարկուճ: