РИА Новости-ի փոխանցմամբ՝ Իրանի արտգործնախարար Ալի Աքբար Սալեհին լրագրողների հետ զրույցում հայտարարել է, որ Իրանի և «վեցյակ»-ի (Իրանի միջուկային ծրագրի հարցում միջազգային միջնորդ խումբ) միջև բանակցությունները, ամենայն հավանականությամբ, կանցկացվեն Ստամբուլում.
«Դեռևս հստակեցված չէ բանակցությունների վերսկսման ժամկետը։ Սակայն ես հույս ունեմ, թե դրանք տեղի կունենան մոտ ապագայում։ Ամենայն հավանականությամբ, դրանք տեղի կունենան Ստամբուլում»։
Հիշեցնենք, որ Իրանի և «վեցյակ»-ի միջև Իրանի միջուկային ծրագրի շուրջ բանակցությունները մեկնարկել են 2003 թվականին։ Այդ բանակցությունները, սակայն, ընդհատվեցին 2009 թվականին, երբ ԱԷՄԳ-ի ղեկավար խորհուրդը Իրանին քննադատեց ուրանի հարստացման երկրորդ գործարանի կառուցման համար։ Առավել վաղ Իրանի և «վեցյակ»-ի միջև բանակցություններն արդեն իսկ անցկացվել են Թուրքիայի տարածքում։