Այսօր Շենգավիթ համայնքի ընդհանուր իրավասության դատարանում պայմանագրային զինծառայող, լեյտենանտ Արտակ Նազարյանի մահվան գործով դատավոր Սամվել Մարդանյանը որոշում կայացրեց դատավարությունը տեղափոխել Տավուշի մարզ՝ Իջևան։
Ինչպես «Առաջին լրատվական»-ի հետ զրույցում նշեց Արտակ Նազարյանի քույրը՝ Ծովինար Նազարյանը, փորձ է արվում դատավարությունը անցկացնել աչքից հեռու, քանի որ այն հանրային վերահսկողության ներքո է:
Նա նշեց, որ Տավուշի մարզի ընդհանուր իրավասության դատարանի նախագահը բազմիցս սպառնացել է, որ դատավարությունը կտեղափոխի Տավուշի մարզ այն դեպքում, երբ տհաճ հարցեր էին հնչում, երբ իր համար ոչ ցանկալի փաստեր էին բացահայտվում, երբ բացարկ էին հայտնում դատավորին կամ դատախազին: «Նա դա գնահատում էր դատավարության ձգձգում, բայց դա նորմալ դատավարական գործընթաց է, որը պետք է իրականացվի: Ամեն բան ընթանում էր օրինականության շրջանակում, բայց նրա կողմից սպառնալիքները շարունակվում էին: Դատավորը դա իրականացրեց, որպեսզի դատաքննությունը չընթանա այն ուղով, որ կարող էր լինել արդարության դեպքում»,- ասաց Արտակի քույրը:
Ծովինար Նազարյանի հավաստիացմամբ՝ այս որոշումը կխաթարի արդար դատավարությունը մի քանի պատճառներով: «Առաջինը՝ գործով մի քանի վկաներ Իջևանից են, և նրանց նկատմամբ ճնշումներ գործադրելը հեշտ է Իջևանում, և առավել հեշտ է դատավարությունը սխալ ուղղությամբ տանելը: Երկրորդը՝ Իջևանում դատերը նշանակվում են ժամը 14.00-ից, այսինքն՝ երեք-չորս ժամ է շարունակվում դատական նիստը՝ ավելի կարճ: Իջևանում նաև կլինեն շատ բացակայություններ, որոնց դեպքում դատական նիստը կհետաձգվի»,- մտահոգություն հայտնեց Արտակ Նազարյանի քույրը՝ հավելելով, թե դատավորը նաև հույս ունի, որ կպակասի ուշադրությունը այս դատավարության նկատմամբ:
Ծովինար Նազարյանը նշեց, որ դատավարության մասնակիցները, վկաները հիմնականում Երևանից և մերձակա մարզերից են, որոնց հարմար չէ ամեն դատական նիստի ժամանակ Տավուշի մարզ հասնելը: Դատավորի այս որոշումը Ծովինարը կապում է նաև նախորդ դատական նիստի ընթացքում տեղի ունեցած միջադեպի հետ, սակայն հաստատում է, որ, միևնույն է, այս տեղափոխությունը պետք է տեղի ունենար, քանի որ շատ փաստեր էին սկսում ջրի երես դուրս գալ:
Հիշեցնենք՝ նախորդ դատական նիստի ընթացքում վկա Արման Մնացականյանը նշել է, որ ամբաստանյալները բռնություն են գործադրել Արտակ Նազարյանի նկատմամբ: Պաշտպանի հարցերից հետո վկան պարզաբանել է, որ Կիրակոսյանը ոլորել է Արտակ Նազարյանի պարանոցը: Վկայի պատասխանները խառնաշփոթ են առաջացրել դատական նիստի դահլիճում՝ մեղադրյալ Հարութիկ Կիրակոսյանի հարազատների և տուժողի հարազատների շրջանում: Նշենք, որ հաջորդ դատական նիստը, որին, հավանաբար, չեն մասնակցի նաև Արտակ Նազարյանի հարազատները, դատավոր Մարդանյանը նշանակել է հունվարի 24-ին:
Տավուշի մարզի «Մեհրաբներ» զորամասի դիրքերում 2010 թվականին մահացած 30-ամյա պայմանագրային զինծառայող Արտակ Նազարյանի գործով մեղադրվում են նրա հինգ ծառայակիցները։ Լեյտենանտի մահվան պաշտոնական վարկածը ինքնասպանությունն է, որը, Ծովինար Նազարյանի համոզմամբ, փորձում են դակել և դատավճիռ կայացնել: