Ինչպես հաղորդում է Ասպարէզ օրաթերթը, CNN International-ը հանգստյան օրերին կցուցադրի Մուսա լեռան հերոսական ինքնապաշտպանության մասին ֆիլմը: Այն պատրաստել է Երկիր մեդիա հեռուստաընկերությունը, եւ նվիրված է Հայոց ցեղասպանության 95-ամյակին:
Ֆիլմը պատրաստել է նույն ընկերության լրագրող Գայանե Ավետիսյանը: Ֆիլմում տեղ են գտել կադրեր վերջերս նշված տարելիցից, ինչպես նաեւ հարցազրույցներ Մուսա լեռան ինքնապաշտպանությունը վերապրածների ժառանգների հետ: Հայկական համայնքներն ամբողջ աշխարհում նշում են Փոքր Ասիայի այս երբեմնի ծաղկուն քաղաքի օրը: Օսմանյան կայսրության տարածքում եղած մի քանի հարյուր հայկական գյուղերից, ավաններից, քաղաքներից, որտեղից ողջ բնակչությունը քշվել է Սիրիական անապատ, Մուսա Դաղն այն 4 վայրերից մեկն էր, որտեղ կազմակերպվեց ինքնապաշտպանություն:
Վեց գյուղերի ողջ բնակչությունը, իմանալով երիտթուրքական կառավարության իրական նպատակների մասին, ընտանիքներով տեղափոխվեց սարեր, որտեղ կազմակերպեցին ինքնապաշտպանություն:
Օսմանյան կայսրությունում հայկական համայնքների ջարդի ֆոնին Մուսա լեռան ինքնապաշտպանությունը դարձավ յուրօրինակ խորհրդանիշն այն բանի, որ հայկությունը կվերապրի: Մյուս երեք վայրերը, ուր ինքնապաշտպանություն էր կազմակերպվել , Շաբին Կարահիսարն էր, Ուրֆան եւ Վանը: