«2004 թվականից ի վեր Հայաստանում գրանցվել է բարձր տեխնոլոգիաների ներմուծման կտրուկ աճ, ինչը մասամբ պայմանավորված է հեռահաղորդակցման ոլորտի ինտենսիվ զարգացմամբ (2004-2007թթ. բարձր տեխնոլոգիաների ներմուծման միջին տարեկան աճը կազմել է 54 տոկոս)»,- այս մասին ասված է օրերս «Տնտեսություն և արժեքներ» հետազոտական կենտրոնի հրապարակած Հայաստանի ազգային մրցունակության երրորդ զեկույցում: «Համաշխարհային տնտեսական ճգնաժամի պատճառով բարձր տեխնոլոգիաների ներմուծման ծավալները սկսել են նվազել՝ սկսած 2008 թվականից: Նվազման այս միտումը շարունակվելու դեպքում կարող է վտանգել Հայաստանի երկարաժամկետ զարգացումը: Մեծ ծավալներով բարձր տեխնոլոգիաներ և արտադրական միջոցներ ներկրող երկրներում ավելի մեծ է նորարարությունների ներդրման և տնտեսական առաջընթացի հավանականությունը»,- նշված է զեկույցում: Ըստ այդմ` 2001-2009թթ. ընթացքում տարածաշրջանում բարձր տեխնոլոգիական ապրանքների ու ծառայությունների և՛ ներմուծման, և՛ արտահանման առումով առաջատարը Թուրքիան է, իսկ Վրաստանը գրանցել է ներուծման աճ՝ միաժամանակ արձանագրելով արտահանման ծավալների կրճատում: «Ադրբեջանում նշանակալի որևէ միտում չի գրանցվել: Ապագայում Հայաստանի կատարողականը կախված կլինի բարձր տեխնոլոգիաների ներմուծման խթանումից և արտադրության արդիականացումից, ինչպես նաև ավելացված արժեքով ապրանքների և ծառայությունների հետագա արտահանումից»,- ասված է զեկույցում:
