«168 ժամ»-ը գրում է.
«Կարծես թե սկսում են ուրվագծվել ապագա խորհրդարանում իշխանական ուժերի վերադասավորվածության և ընդգրկվածության չափաբաժինները: Այլևս ակնհայտ է, որ ԱԺ ընտրություններին իշխանության մաս կազմող հիմնական երկու կուսակցությունները` Հայաստանի Հանրապետական կուսակցությունը (ՀՀԿ) և «Բարգավաճ Հայաստանը» (ԲՀԿ) մասնակցելու են առանձին ցուցակներով: Այլ հարց է «Օրինաց երկիրը» (ՕԵԿ), որի ձեռքը բառիս բուն իմաստով կրակն են ընկել իշխանությունները: Այն իմաստով, որ ՕԵԿ-ը հանդես գա առանձին ցուցակով, որքան էլ ձեթ ու օղի բաժանի, միևնույնն է, չի կարող հաղթահարել նվազագույն 5 տոկոսի շեմը: Այդ է պատճառը, որ այս օրերին քննարկվում է նաև ՕԵԿ-ականների ՀՀԿ համամասնական ցուցակում ընդգրկելու հարցը»:
Թերթի տեղեկություններով` ՀՀԿ գործադիր մարմնի վերջին նիստում ՀՀ նախագահ Սերժ Սարգսյանի մասնակցությամբ քննարկվել է ԲՀԿ-ին մեծամասնական 41 պատգամավորական տեղերից 7-9-ը տեղ հատկացնելու հարցը, որին, ի դեպ, ինչպես նշվել է նիստի ընթացքում, ԲՀԿ ղեկավարությունը դեմ է:
«Գագիկ Ծառուկյանը շատ ավելին է ցանկանում, քան նրան այսօր առաջարկվում է: Հիշեցնենք, որ ԲՀԿ-ն 2007թ. ԱԺ մուտք գործեց ընդհանուր` 25 պատգամավորներով` 15,13 տոկոս ձայնով (որից 7-ը` մեծամասնական ընտրակարգով), այնուհետև համալրվեց ևս 4 մեծամասնական անկախ պատգամավորներով:
Երեկ ՀՀԿ-ական շրջանակներում խոսվում էր այն մասին, թե ՀՀԿ-ԲՀԿ ղեկավարությունը գործադիր մարմնի նիստից հետո սկսել են բանակցել ԲՀԿ-ին 11 մեծամասնական տեղ հատկացնելու շուրջ»:
Թերթը հիշեցնում է, որ 2011թ. փետրվարի 17-ի քաղաքական կոալիցիայի` ՀՀԿ, ԲՀԿ, ՕԵԿ կողմից արված հայտնի հայտարարության մեջ ասվում էր «Նոր փոփոխություններին ընդառաջ` կոալիցիոն կուսակցությունները միասնական են և նպատակ չունեն գալիք խորհրդարանական ընտրություններում իրենց քաղաքական կշիռն ավելացնել միմյանց դեմ պայքար ծավալելու և կոալիցիայի ներսում ուժերի հարաբերակցությունը փոխելու հաշվին»: