«Հրապարակ»-ը գրում է, որ այսօր «Նուբարաշեն» քրեակատարողական հիմնարկում գտնվող մոտ 20 ցմահ դատապարտյալներ հացադուլ են հայտարարելու:
«Նրանք 3 նամակ են պատրաստել ՀՀ նախագահին, Եվրախորհրդի և Կարմիր խաչի գրասենյակներին, որտեղ տեղեկացնում են իրենց մտադրության մասին և պահանջում, որ ՀՀ նախագահի ներկայացուցիչն այցելի իրենց և լսի իրենց պահանջը: Իսկ նրանք պահանջում են օրենքով նախատեսված կարգով վերանայել իրենց գործերը և իրենց պատիժները համապատասխանեցնել ՀՀ Քրեական օրենսգրքի փոփոխություններին, այսինքն` պատիժ սահմանել 15-20 տարի ազատազրկման շրջանակներում»,- ապա թերթը հավելում է.
«Վերջին ամիսներին նրանք բազմիցս նամակներ են հղել պատկան մարմիններին, սակայն անպատասխան են մնացել: Եվ դա դարձել է այս ծայրահեղ քայլի պատճառը: Նրանք նշում են, որ եթե իրենց պահանջն այս անգամ էլ մնա անարձագանք, մի քանի օր անց առաջին 20 հացադուլավորներին կմիանան հաջորդ 20-ը, և այսպես շարունակ` մինչև իրենց ձայնը լսվի»: