ԼՂՀ ԱԺ-ն նախօրեին միաձայն ընդունել է ԼՂՀ կառավարության կողմից խորհրդարան ներկայացրած 2011 թվականի բյուջեի նախագիծը: Նիստին ներկա բոլոր 31 պատգամավորները կողմ են քվեարկել նախագծին:
Նիստում փոխվարչապետ, ֆինանսների նախարար Սպարտակ Թևոսյանը հայտարարեց, որ բոլոր առաջարկություններն ու դիտողություններն ամփոփելուց հետո գալիք տարվա պետբյուջեով եկամտային մաս է սահմանվել 64 մլրդ 714 մլն 200 հազար դրամ. նախապես ԼՂՀ կառավարությունն առաջարկել էր եկամուտների մասով բյուջեն կազմել 61 մլրդ 773.8 մլն դրամ: Ծախսային մասով թվերը չեն փոխվել` 64 մլրդ 620 մլն դրամը մնացել է։ ԼՂՀ եկող տարվա բյուջեի դեֆիցիտը կկազմի 2 մլրդ 846.2 մլն դրամ։ Ըստ պաշտոնական հայտարարության` բյուջեի 60 տոկոսը կուղղվի սոցիալական ծրագրերին: Մինչ քվեարկությունը, պատգամավորական խումբ-խմբակցությունները իրենց տեսակետներն են արտահայտել բյուջեի վերաբերյալ:
«Արցախատուն» պատգամավորական խմբի ղեկավար Գարիկ Գրիգորյանը հայտարարել է, թե բյուջեի նախագիծը «կարելի է համարել հավասարակշռված և իրատեսական»։ Նա հույս է հայտնել նաև, որ մոտակա տարիների ընթացքում իրականացվող բարեփոխումները բնակչության համար կտան շոշափելի արդյունքներ։ ՀՅԴ խմբակցության ղեկավար Արմեն Սարգսյանը հայտարարել է, թե բյուջեի նախագիծն ավելի մանրամասն ուսումնասիրելու նպատակով անհրաժեշտ է այն ԱԺ ներկայացնել առնվազն 50 օր առաջ, ինչն օրենքով թույլատրվում է։ Այդուհանդերձ, Սարգսյանն էլ որևէ բացասական բան չի ասել նախագծի հասցեին` հայտարարելով, որ ԼՂՀ եկող տարվա բյուջեն ունի ընդգծված սոցիալական բնույթ: «Ժողովրդավարություն» խմբակցության քարտուղար Վարդգես Բաղրյանը ևս գովասանքի խոսքեր է ասել նախագծի հասցեին: Ինչ վերաբերում է «Հայրենիք» խմբակցությանը, ապա այն, բնականաբար, միանշանակ կողմ է արտահայտվել նախագծին, քանի որ վարչապետ Արա Հարությունյանը «Ազատ հայրենիք» կուսակցության ղեկավարն է, որի հիման վրա էլ ձևավորվել է «Հայրենիք» խմբակցությունը:
Նիստի ժամանակ ելույթ է ունեցել նաև ԼՂՀ վարչապետը, ով ներկայացրել է եկող տարվա բյուջեի նախագծի հիմնական մեխերը: Ըստ Արա Հարությունյանի` բյուջեի հիմնական խնդիրներն են համարվում` համախառն ներքին արդյունքի 9-տոկոսանոց աճը, պետական եկամուտների հավաքագրման բարձր մակարդակը, բնակարանային շինարարության էական աճը, սոցիալական ապահովության համակարգի ֆինանսավորման աճը, առողջապահության ոլորտին ուղղվող պետական ծախսերի ֆինանսավորման աճը, զոհված ազատամարտիկների ընտանիքներին բնակարանով ապահովելու ծրագրի ավարտը և այլն: «ՀՆԱ-ի աճն ապահովելու նպատակով շարունակվելու են փոքր և միջին ձեռնարկատիրության զարգացման պետական աջակցության ծրագրերը, որոնք կհանգեցնեն նաև զբաղվածության մակարդակի բարձրացման: …Արդյունաբերությունում աճ են ապահովելու շինանյութերի արտադրությունը, գյուղմթերքների վերամշակումը և էներգետիկան: 2010-ին շահագործվել են 2 փոքր` 3 Մվտ հզորությամբ ՀԷԿ-եր, իսկ 2011-ին սպասվում է ևս 4 փոքր ՀԷԿ-երի շահագործում, ընդհանուր առմամբ` 18 Մվտ հզորությամբ: 2012 թվականից արդեն ԼՂՀ-ում կարտադրվի ավելի քան 290 մլն կվտ/ժ էլեկտրաէներգիա, որն ավելին է, քան ներքին սպառման ծավալները: Կառավարության կողմից ուսումնասիրության փուլում է էներգետիկայի մի ուղղություն ևս, որը կոչվում է կենսաէներգետիկա: Այն թույլ կտա մի քանի տարվա մեջ ամբողջությամբ լուծել ջեռուցման հարցը, անկախանալ գազի գնի պարբերական թանկացումից, միաժամանակ` նպաստել զբաղվածության խնդրի լուծմանը», – հայտարարել է Արա Հարությունյանը` հավելելով, որ ԼՂՀ-ն հաջողություններ է ակնկալում նաև արտաքին քաղաքականության բնագավառում. Հարությունյանը կարծում է, որ ՀՀ-ի և սփյուռքի հետ համատեղված ջանքերով կարող են հասնել ԼՂՀ ճանաչմանը: