2010թ. ընթացքում Մշակույթի նախարարության իրականացրած ծրագրերի արդյուքները լրագրողների ներկայացնելով` նախարար Հասմիկ Պողոսյանը ասաց, թե ավելի շատ ծրագրեր չեն հասցրել, քան թե հասցրել են իրականացնել: Պողոսյանի գնահատմամբ, անելու շատ բան կա և ժամանակը չի բավականացնում: Նախարարը նշեց, որ հաջորդ տարում պետք է անպայման ստեղծվեն մշակութային արժեքների վերականգնողական կենտրոններ և բացի մասնագետների պատրաստումից` պետք է այդ կենտրոնները հագեցվեն համապատասխան տեխնիկական միջոցներով: Պողոսյանը նաև տեղեկացրեց, որ 2011թ. գերակա են լինելու մշակութային կրթության ծրագրերը:
2010թ. տեղի ունեցած մշակութային իրադարձություններից Հասմիկ Պողոսյանը առանձնացրեց «Աիդա» օպերայի պրեմիերան, ռեժիսոր Վիգեն Չալդրանյանի բեմադրությամբ «Եվգենի Օնեգին» օպերայի ստեղծումը, արտերկրում անցկացված վեց խոշոր ցուցահանդեսները, որոնցից կարևորեց Պուշկինի անվան արվեստի թանգարանում և Տրետյակովյան պատկերասրահում անցկացվածները:
Իսկ Դոմինգոյի համերգի շուրջ ծավալված կրքերը Հասմիկ Պողոսյանին զարմացրել էին. «Իհարկե, լավ է, որ Հայաստան այնպիսի երկիր է, որտեղ համերգներ են ունենում համաշխարհային աստղերը, սակայն ես ցանկանում եմ, որ նման կրքեր և ոգևորություն ավելի շատ լինի մեր ազգային մշակույթի շուրջ»:
Հասմիկ Պողոսյանը նաև տեղեկացրեց, որ 2010թ. ընթացքում մշակույթի նախարարության համակարգի 24 թանգարաններում իրականացվել է շուրջ 900 հազար միավոր թանգարանային արժեքների վերահաշվառում, 22 թանգարաններ արդեն ունեն իրենց վեբ կայքերը, Արևմտյան Հայաստանում իրականացվել է 450 պատմամշակութային հուշարձանի վավերագրում, պետական պատվերով և պետական աջակցությամբ հրատարակվել է ավելի քան 110 անուն գիրք:
