Հ.Պողոսյան. Հավատարիմ եմ իմ գործին և այն մշակույթին, որի ծնունդն եմ

Դեկտեմբերի վերջին սկսված պաշտոնանկությունների շարունակականության մասին խոսում են բոլորը, և արդեն իսկ շրջանառվում են մի քանի նախարարներ, որոնք գալիք տարում զրկվելու են իրենց պաշտոններից: ՀՀ մշակույթի նախարար Հասմիկ Պողոսյանի պաշտոնանկության մասին ևս լուրեր են շրջանառվում: Տարեվերջյան ամփոփիչ ասուլիսի ընթացքում, մշակույթի նախարարը, անդրադառնալով այդ հարցին, ասաց. «Մարդիկ առավոտյան արթնանում են ինչ-որ տարբեր մտքերով: Եթե ինչ-որ մեկը ուզում է իմ պաշտոնանկությունը, ապա ես խնդիր չունեմ, այդ որոշումը ես չեմ կայացնում: Ես աշխատում եմ, կատարում եմ իմ պարտականությունները, ես անում եմ այն, ինչը պիտի անեի և կանեմ` անկախ նրանից` նախարար կլինե՞մ, թե՞ ոչ: Հավատարիմ եմ իմ գործին և այն մշակույթին, որի ծնունդն եմ»:
Իսկ խոսելով Սերժ Սարգսյանի այն հայտարարության մասին, թե պետական չինովնիկը պետք է համապատասխանի իրեն տրված որոշակի չափանիշներին, Հասմիկ Պողոսյան ասաց, որ ինքը չի կարող գնահատական տալ, թե արդյոք համապատասխանում է պետական չինովնիկի համար տախատեսված պահանջներին. «Ես երբեք ոչ մի առումով չեմ սիրում ինձ որևէ գնահատական տալ: Թե ինչպիսի չինովնիկ եմ, թող տան այդ գնահատականը այն մարդիկ, ովքեր պետք է տան: Ես միայն իմ գործողությունների համար եմ գնահատական տալիս»: