Սպառազինությունների հայ-ադրբեջանական մրցավազք

Գյումրիի 102-րդ ռուսական ռազմակայանի տարածքում հակաօդային պաշտպանության հայ-ռուսական համատեղ հրամանատարական կետի բացումն, ինչպես երևում է, թեթև չնստեց ադրբեջանական կողմի վրա: Օրերս Ադրբեջանի խորհրդարանում գրեթե միաձայն վավերացվեց Թուրքիայի և Ադրբեջանի միջև ռազմական օգնության և համագործակցության համաձայնագիրը, որը երկու երկրների նախագահները ստորագրել էին օգոստոսի 16-ին Բաքվում: Գրեթե միաժամանակ Հայաստանն ու Ռուսաստանը երկարաձգեցին ռազմակայանի տեղակայման ժամկետը: Այս իրադարձությունները, հայաստանյան ռազմական փորձագետների կարծիքով, վկայում են, որ Հայաստանի և Ադրբեջանի միջև սպառազինությունների լուրջ մրցավազք է ընթանում, և այս մրցավազքում հակամարտող կողմերի դաշնակից են դարձել տարածաշրջանային տերությունները: Համաձայնագրին առնչվող ադրբեջանական մեկնաբանությունները փաստում են, որ սրանով Ադրբեջանն ապահովագրում է իրեն, ու՞մ դեմ` ռուս-հայկական ռազմավարական համագործակցության: «Այսինքն՝ ինչո՞ւ Հայաստանը կարող է Ռուսաստանի հետ ռազմական ոլորտում ռազմավարական գործընկերություն ունենալ, իսկ Ադրբեջանը` ո՞չ»,- Ադրբեջանի գործողություններն այսպես է մեկնաբանում ռազմական փորձագետ Արծրուն Հովհաննիսյանը: Փորձագետը նաև հիշեցնում է վերջերս Ադրբեջանի մեջլիսի փոխխոսնակի խիստ քննադատությունը՝ ուղղված Ռուսաստանին` Հայաստանին սպառազինություն տրամադրելու համար, երբ փոխխոսնակը հոխորտաց, թե Ադրբեջանը 10 անգամ գերակայում է հայկական զինված ուժերի նկատմամբ, և իրենք ամեն գնով կանեն այն, ինչը, ուշ թե շուտ, պետք է լինի: Իսկ թուրք-ադրբեջանական այս համաձայնագիրն, ըստ փորձագետի, անմիջական կապ ունի ադրբեջանական ակնհայտ ագրեսիայի և կտրուկ հայտարարությունների հետ: