Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցին անցած շաբաթ Ոստիկանության Լոռու մարզի քննչական բաժինը հարցաքննության է կանչել` օգնության համար իրեն դիմած քաղաքացու նկատմամբ սպառնալիքներ կիրառելու կասկածանքով:
Ինչպես հաղորդում է «Ազատություն» ռադիոկայանը, քաղաքացին դիմել էր Սաքունցի ղեկավարած իրավապաշտպան կազմակերպության գրասենյակ` ահազանգելով ոստիկանությունում իր նկատմամբ բռնություններ կիրառելու մասին: Վերջինս էլ, իր հերթին, այդ մասին հաղորդում է ներկայացրել ոստիկանություն, ինչից հետո, սակայն, քաղաքացին հրաժարվել է իր բողոքից: Սրան հաջորդել է իրավապաշտպանի հարցաքննումը ոստիկանությունում:
«Դուրս է գալիս, որ ես քաղաքացուն ստիպել եմ, որ նա գա գրասենյակ»,- պատմում է Սաքունցը` նշելով, թե ոստիկանությունում ասել են, թե նա սպառնալիքներով է քաղաքացուն ստիպել ասել է, թե ոստիկանությունում իր նկատմամբ բռնություն են գործադրել:
«Աբսուրդը ոչ միայն դա է, այլ որ ժողովրդավարական կամ իրավական պետություն [կոչվելուն] հավակնող երկրում իրավապահ մարմինները ոչ թե զբաղված են քաղաքացիների նկատմամբ ոստիկանության աշխատակիցների բռնությունների բացահայտմամբ, քննությամբ, այլ հենց բռնության ենթարկված քաղաքացուն են ահաբեկում, որ նա չբողոքի: Դա քիչ է` նաև այդ բռնության դեպքերի վերաբերյալ ահազանգող իրավապաշտպան ներկայացուցիչների նկատմամբ են քրեական գործի հարուցման սպառնալիքով են փորձում ճնշել»,- ասել է նա` նշելով, որ ոստիկանությունում քաղաքացիների նկատմամբ բռնությունների վերաբերյալ Հելսինկյան քաղաքացիական ասամբլեայի Վանաձորի գրասենյակի ներկայացրած բողոքները հիմնականում մնում են առանց քննության, քրեական գործեր չեն հարուցվում:
Ոստիկանության Լոռու մարզի քննչական բաժնի պետ Գագիկ Իսպիրյանն «Ազատություն» ռադիոկայանի հետ զրույցում անդրադարձել է այն դեպքին, որի շրջանակում իրենք Սաքունցին կասկածել են քաղաքացուց սպառնալիքի միջոցով բողոք վերցնելու մեջ: Իսպիրյանն ասել է, թե սպառնալիքի փաստը չի ապացուցվել:
Լոռու մարզի դատախազ Կարեն Շահբազյանն էլ է նշել, որ ստուգել են փաստերը և հիմնավորել, որ սպառնալիքներ չեն եղել:
«Մարդիկ թյուրիմացության մեջ են ընկել, որի կապակցությամբ էլ հրավիրել ենք Սաքունցին ու բացատրություն են վերցնել»,- ասել է դատախազը:
Շահբազյանը հավելել է, որ ոստիկանությունում քաղաքացու` բռնության ենթարկվելու մասին տեղեկությունը ևս հերքվել է. «Ինքը ասել է` ոստիկանները ծեծել են: Պարզվել է, որ սուտ է ասել»:
