Ռուսաստանի ջավախահայերը հանդես են եկել հայտարարությամբ, որտեղ անդրադարձել են Ամենայն հայոց Կաթողիկոս Գարեգին Բ-ի Վրաստան այցելության անընդհատ հետաձգմանը:
Ներկայացնում ենք հայտարարության տեքստը.
«Ամենայն հայոց Կաթողիկոս Գարեգին Բ-ի հովվապետական այցելությունը Վրաստան, որը նախատեսված էր նոյեմբերի կեսերին, հերթական անգամ հետաձգվել է, քանի որ, իբր, Վրաստանի Պատրիարք Իլյա Երկրորդը բուժումից հետո վերականգնման կարիք ուներ: Սակայն վրացական կողմի փաստարկները գնալով ավելի ու ավելի անհամոզիչ են դառնում, հաշվի առնելով տեղի ունեցող մի շարք իրադարձություններ:
Ելներով այդ ամենից, Ռուսաստանի ջավախահայերը պահանջում են.
– Մենք պահանջում ենք անհապաղ լուծել հայ առաքելական եկեղեցու վրացական թեմի կարգավիճակի խնդիրը:
– Մենք պահանջում ենք վերադարձնել բռնազավթված հայկական կոթողները, սրբավայրերը եւ պատմական հուշարձանները
– Մենք պահանջում ենք անհապաղ ընդունել Վրաստանում կրոնի եւ կրոնական միությունների վերաբերյալ օրենք
– Մենք պահանջում ենք առանց որեւէ նախապայմանի կոնկորդատ կնքել Վրաստանի պետության եւ սուրբ հայ առաքելական եկեղեցու միջեւ
– Մենք պահանջում ենք ապահովել հավասար իրավունքներ, պայմաններ եւ ազատություններ Վրաստանի հանրապետության տարածքում գրանցված բոլոր կրոնական միությունների համար
– Մենք պահանջում ենք չհետաձգել եւ կազմակերպել հանդիպում Վրաստանի եւ Հայաստանի հոգեւոր առաջնորդների միջեւ
– Մենք պահանջում ենք հետեւել եւ կիրառել Վրաստանի սահմանդրության խղճի եւ դավանանքի ազատություն ապահովող 19 հոդվածը»:
