1930թ. այս օրը ծնվել է հայ տաղանդավոր կոմպոզիտոր Էդգար Հովհաննիսյանը:
Նա բացառիկ ներդրում է ունեցել հայ երաժշտարվեստի զարգացման գործում:
Էդգար Հովհաննիսյանը 1953 թ. ավարտել է Երևանի Կոմիտասի անվան պետական կոնսերվատորիան` Գր. Եղիազարյանի դասարանը, 1957 թ. Արամ Խաչատրյանի ղեկավարությամբ` Մոսկվայի կոնսերվատորիան:
Էդգար Հովհաննիսյանը ԽՍՀՄ ժողովրդական արտիստ էր, պետական մրցանակի դափնեկիր, 32 տարեկանից՝ 1962-68թթ., ղեկավարել է Օպերայի և բալետի ազգային ակադեմիական թատրոնը, 1970-74թթ. եղել է երգի-պարի պետական անսամբլի գեղարվեստական ղեկավարը, իսկ ավելի ուշ՝ 1986-92թթ., պետկոնսերվատորիայի ռեկտորն էր:
1998թ. Էդգար Հովհաննիսյանին շնորհվել է Երևանի պատվավոր քաղաքացու կոչում:
1986-1992 թթ. կոմպոզիտորը ղեկավարել է Երևանի Կոմիտասի անվան պետ.կոնսերվատորիան: Ականավոր կոմպոզիտորի գրչին են պատկանում «Սասունցի Դավիթ» օպերա-բալետը, «Հավերժական կուռք», «Անտունի», «Ժաննա դ’Արկ», «Սուլամիթ» բալետները, «Գրիգոր Նարեկացի» օրատորիան, երեք սիմֆոնիաները, մի շարք ժողովրդական երգերի մշակումներ, կամերային և երգչախմբային ստեղծագործություններ: