«Առավոտ»-ի` ոստիկանությունում ունեցած աղբյուրների փոխանցմամբ` օրերս Արթիկում հնչած կրակոցների պատճառով աշխատանքից ազատել են Արթիկի քրեական հետախուզության բաժանմունքի պետ Արմեն Հակոբյանին:
«Հիշեցնենք, որ երկու օր առաջ Շիրակի կրիմինալ դեմքերից մեկը` գետափցի Անուշավան Բաղդասարյանը Արթիկում «ռազբորկայի» մեջ էր մտել ծառայության մեջ գտնվող 35-ամյա Լուկաշ Մինասյանի հետ: Նա արթիկցի ոստիկանից պահանջել էր պատասխան տալ Ռուսաստանում գտնվող իր խաբեբա եղբոր փոխարեն, որը տարել-աշխատեցրել է իր եղբորը ու փողերը չի տվել»:
ՀՀ ոստիկանության լրատվական բաժնի ղեկավար Արմեն Մովսիսյանը «Առավոտ»-ին փոխանցել է, որ Արթիկի քրեական բաժանմունքի պետն ազատվել է իր սեփական դիմումի համաձայն: Մինչդեռ, ոստիկանության` «Առավոտ»-ի լավատեղյակ աղբյուրների փաստելով` նրան հարկադրել են հեռանալ համակարգից, քանի որ պաշտոնյան կապի մեջ է մտել գետափցի կրիմինալների հետ:
«Ավելի հստակ` քրեական հեղինակության շրջապատը, զանգահարելով նրան, փորձել է բանակցել, հարցեր լուծել, հեռախոսազանգը թաքուն լսել են ու նրան ստիպել են հեռանալ աշխատանքից: Մեզ չհաջողվեց այս թեմայով խոսել Արմեն Հակոբյանի հետ, թե իրականում այդպե՞ս է եղել»:
