Գիտատեխնոլոգիական Ազգային Ակադեմիան, Հայկական Տեխնոլոգիական Ակադեմիան և Էկոլոգիայի Անվտանգության Միջազգային Ակադեմիան իրենց վրդովմունքն են հայտնում ԱԼՄ հեռուստաընկերությանը եթերից զրկելու` ՀՌԱՀ-ի դեկտեմբերի 16-ի որոշման առթիվ:
«Մենք չափազանց կարևորում ենք Այլընտրանքային հեռուստաընկերության գոյությունը, ուստի գտնում ենք, որ ԱԼՄ-ի եթերազրկումը մեծ հարված է հասցնում խոսքի ազատությանը մեր երկրում, խոչընդոտում է բազմակարծության լիարժեք դրսևորմանը և սահմանափակում քաղաքացիների տեղեկացված լինելու սահմանադրական իրավունքը:
Մեր կարծիքով` ՀՌԱՀ-ը «արջի ծառայություն» է մատուցել ՀՀ իշխանություններին` չգիտակցելով, որ իր անարդար և կողմնակալ որոշմամբ ավելացնում է ժողովրդի օրեցօր աճող հիասթափությունը և առիթ դառնում նոր արտագաղթի:
Մեր համոզմամբ` ՀՌԱՀ-ի կողմից ԱԼՄ հեռուստաընկերության եթերազրկման որոշումը խիստ սուբյեկտիվ է, չի բխում քաղաքացիական հասարակության և ժողովրդավարության շահերից, ուստի մենք խստագույնս դատապարտում ենք այդ որոշումը և մեր զորակցությունն ենք հայտնում ԱԼՄ հեռուստաընկերության ողջ կոլեկտիվին»: