Դեկտեմբերի 24-ի առավոտյան Երևանի քաղաքապետ Կարեն Կարապետյանն այցելեց նոյեմբերի 24-ին մայրաքաղաքի կենտրոնում բռնկված հրդեհի հետևանքով տուժած ընտանիքներին։ Մաշտոցի պողոտայի թիվ 52 և 54 շենքերի և Կորյունի փողոցի թիվ 21 և 21ա շենքերի միջև գտնվող անհատական տների հրդեհվելուց հետո վրաններում ապրող բնակիչներին, քաղաքապետի հանձնարարությամբ, կհատկացվի դրամական աջակցություն։ Կարեն Կարապետյանը բնակիչների հետ հանդիպման ժամանակ նշեց, որ անօթևան ընտանիքները 4 ամիս կապրեն վարձակալությամբ։ Բնակիչները վարձակալությամբ ապրելու համար քաղաքապետարանի կողմից կստանան հատուցում, որից հետո նրանց խնդրին կտրվի հիմնավոր լուծում։ Հրդեհից տուժած բնակիչներին Կենտրոն վարչական շրջանի կողմից հատկացվել է նաև վառելափայտ և հագուստ։
Երևանի քաղաքապետարանի տեղեկատվության և հասարակայնության հետ կապերի վարչություն
