Հունվարի 10-ին Մարդու իրավունքների եվրոպական դատարանը հրապարակել է երկու նոր վճիռ` պաշտպանելով համոզմունքի հիմնավորմամբ զինծառայությունից հրաժարվող երկու երիտասարդների իրավունքները` «Բուխարատյանն ընդդեմ Հայաստանի» և «Ծատուրյանն ընդդեմ Հայաստանի» գործերով:
Նշված գործերով երկու դիմումատուներն էլ «Եհովայի վկաներ» կազմակերպության անդամներ են:
Այս մասին «Առաջին լրատվական»-ը տեղեկանում է «Եհովայի վկաներ» կրոնական կազմակերպությունից:
Երկու դիմումատուներն էլ` Հայկ Բուխարատյանն ու Աշոտ Ծատուրյանը, 2003թ. Հայաստանի իշխանությունների կողմից դատապարտվել են 2 տարվա ազատազրկման` զինծառայությունից հրաժարվելու համար:
Նրանք դիմել էին Եվրադատարան` նշելով, որ խախտվել են Եվրոպական կոնվենցիայի 9-րդ հոդվածով երաշխավորված իրենց իրավունքները:
«Եհովայի վկաներ» կազմակերպության հաղորդմամբ` վերջերս Հայաստանում դատապարտվել է համոզմունքի հիմնավորմամբ զինծառայությունից հրաժարվող ևս 5 երիտասարդ: