Դելֆինները սատկելու են

Մի շարք բնապահպանական ՀԿ-ներ պայքարում են Երևանում դելֆինարիումի դեմ: Այսօր նրանք ասուլիս էին հրավիրել` իրազեկելու հասարակությանը և կոչ անելու միանալ ցույցին: «Դելֆինները լողում են օրական 100կմ, իսկ կառուցված դելֆինարիումի լողավազանի շառավիղը 18մ է, խորությունը` 5մ: Փոքր տարածության մեջ դելֆինները մեծ սթրես են ապրում և կարող են մեծ վնաս հասցնել շրջապատող մարդկանց»,- նշեց «Պրոփոուզ» ՀԿ-ի նախագահ էլսիկ Ազիզյանը և զարմանում է, որ կազմակերպիչները առաջարկում են նաև թերապևտիկ ծառայություններ: «Վայրի բնության և մշակույթի պահպանման արժեքներ» հիմնադրամի նախագահ Ռուբեն Խաչատրյանը ներկայացրեց վիճակագրական տվյալներ: «Դելֆիններին տեղափոխելու ճանապարհին մահանում է կենդանիների 70 տոկոսը, դելֆինարիում հասած դելֆինների 50 տոկոսը սատկում է 5-6 ամսվա ընթացքում: Դիմել ենք քաղաքապետարան, բնապահպանության նախարարությանը, սակայն մեզ այդպես էլ պատասխան չեն տվել»,- ասում է «էկոդաշինքի» նախագահ Սիլվա Ադամյանը: Հայաստանի բնապահպաններին աջակցում են նաև գործընկերներ Ուկրաինայից: Նրանք, ի նշան իրենց հայ գործընկերների հետ համերաշխության, ցույց են կազմակերպելու դեկտեմբերի 27-ին: