Գործարար Սիլվա Համբարձումյանի փաստաբան Կարեն Թունյանի ՀՀ վերադաս դատախազին հասցեագրած բողոքը մերժվել է, և փաստաբանը պատրաստվում է դիմել ՀՀ գլխավոր դատախազին:
Կարեն Թունյանը դիմել էր վերադաս դատախազին՝ պահանջելով վերանայել ՀՔԾ որոշումը, որով կարճվել էր գործարար Սիլվա Համբարձումյանի և Սյունիքի մարզպետ Սուրեն Խաչատրյանի միջև տեղի ունեցած միջադեպի փաստի առթիվ ծեծի հատկանիշներով հարուցված քրգործը: «Առաջին լրատվական»-ի հետ զրույցում գործարար Սիլվա Համբարձումյանն ասաց, որ մանրամասներին տեղյակ չէ, սակայն պայքարելու են մինչև վերջ և բողոքարկելու են:
Սիլվա Համբարձումյանի փաստաբան Կարեն Թունյանն ասաց, որ գործի կարճումն այս պահին իրենք համարում են ապօրինի: «Մեր բողոքը հիմնավորելու համար մեզ անհրաժեշտ էին գործի նյութերը: Մենք պահանջում էինք ներկայացնել քրեական գործի նյութի պատճենները, որովհետև մեզ դա ընդամենը տրամադրել են մեկ անգամ, սակայն դա բավականին մեծ փաթեթ է, և որպեսզի մենք կարողանանք հիմնավորել մեր բողոքը, պետք է տրամադրենք գործի նյութերը, որ քննությունն օբյեկտիվ չի եղել, որակումները սխալ են և այլն: Մեզ պետք է, որպեսզի այդ նյութերը լինեն մեր ձեռքի տակ: Մենք որպես բողոքի հիմնավորում ներկայացրել էինք, որ գործի կարճումն անհիմն է և ապօրինի, սակայն ավել հիմնավորումներ չէինք կարողացել ներկայացնել, քանի որ մեզ նյութեր չեն տալիս»,- մեկնաբանեց փաստաբանը`հավելելով, որ փորձել են բացատրել, որ այդ նյութերը ստանալու իրավունք չունեն, իսկ այն պարզագույն հարցերին, թե ինչո՞ւ իրավունք չունենք, փորձել են բացատրել իբրև թե Սիլվա Համբարձումյանը տուժող չի ճանաչվել, ինչը օրենսդրական կազուս է:
Կարեն Թունյանը նաև տեղեկացրեց, որ ՀՔԾ որոշումը բողոքարկելու է գլխավոր դատախազին: «Եթե դա էլ օգուտ չտա, կբողոքարկենք դատական կարգով: Երբ ես ծանոթացա նյութերին, մի քանի հատված ինձ դուր չեկավ: Ես այդ նյութերը ձեռքիս տակ ունենալու անհրաժեշտություն ունեմ»,- նշեց փաստաբանը`ստեղծված իրավիճակն անհիմն որակելով:
Հիշեցնենք, որ անցյալ տարի նոյեմբերի 14-ին Երևանի «Արմենիա-Մարիոթ» հյուրանոցում միջադեպ էր տեղի ունեցել Սյունիքի մարզպետ Սուրեն Խաչատրյանի և գործարար Սիլվա Համբարձումյանի միջև, ում փաստմամբ՝ մարզպետն իրեն ծեծի էր ենթարկել, սակայն հարուցված քրգործը կարճվեց այն հիմնավորմամբ, որ Սիլվա Համբարձումյանը տուժող չի ճանաչվել: