«ՀԺ»-ն գրում է, որ երեկ ՀՀ ոստիկանապետ Վովա Գասպարյանը առաջին անգամ որոշել էր կառավարության նիստից հետո շենքից դուրս գալ ոչ թե ետևի մասից, այլ դիմացի:
«Շոուն կարծես շատ լավ էր ստացվում: Գասպարյանը կառավարության շենքի առաջին հարկում իրեն հատուկ արտիստիկ ոճով շփվեց լրագրողների հետ, մի 15 րոպեում մի 20 անգամ տվեց Աստծու անունը, խոսեց օրենքից, ոստիկանության նկատմամբ վստահության վերականգնումից ու էլի շատ լավ-լավ բաներից, հետո` շենքից դուրս գալով` ավելի արտիստիկ ոճով շփվեց տարբեր հարցերով բողոքող քաղաքացիների հետ:
Արցունքներն աչքերին մի պատմություն պատմող կնոջը իր օգնականի հետ ուղարկեց նստելու իրեն ուղեկցող մեքենաներից մեկը ու քիչ անց ինքն էլ նստեց մեքենան ու գնաց:
«Սուրբ Վովայի հայտնությունը» պայմանական անունով շոուն կստացվեր, եթե մեր ֆոտոխցիկը չֆիքսեր ոստիկանապետին սպասարկող «Մերսեդես-Բրաբուս» ամենագնացի (յաշիկ) դիմապակին: Իսկ այդտեղից բացակայում էին ԱՊՊԱ և տեխզննության կտրոնները»,- ապա թերթը հավելում է.
Եթե ՀՀ որևէ սովորական քաղաքացի փորձի առանց ԱՊՊԱ և տեխզննության կտրոնները մեքենայի դիմապակուն փակցնելու դուրս գալ փողոց, ապա առաջին իսկ պատահած ճանապարհային ոստիկանը կկանգնեցնի մեքենան ու կտուգանի»:
«ՀԺ»-ի հարցին, թե որտեղից Վովա Գասպարյանին այդքան փող այդպիսի մեքենա ունենալու համար, ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը ասել է. «Դե ա չորս տասնամյակ աշխատել է ոստիկանության համակարգում»: