ԵԱՀԿ-ի նախագահությունը ստանձնող երկրի` Լիտվայի ԱԳ նախարար Աուդրոնյուս Աժուբալիսը ԵԱՀԿ ամսագրին տված հարցազրույցում հայտարարել է, որ Լեռնային Ղարաբաղի խնդրի առնչությամբ անհանգստացնող ազդանշաններ է տեսնում, և իրավիճակը մի շարք պատճառներով անհանգստացնող է: Ըստ ադրբեջանական APA գործակալության՝ Լիտվայի ԱԳ նախարարը նշել է, որ ԵԱՀԿ Մինսկի խումբը պետք է արագացնի բանակցային գործընթացի տեմպերը, որի շրջանակներում քաղաքական որոշման փնտրտուք է:
Հարցին, թե իր երկիրը ի՞նչ ներդրում կարող է ունենալ ղարաբաղյան կարգավորման գործընթացում, Ա.Աժուբալիսը պատասխանել է, որ յուրաքանչյուր նախագահող երկիր ցանկանում է ձգձվող հակամարտությունների համար լուծում առաջարկել. «Ակնկալվում է, որ գործող նախագահը կգործի արագ, շահագրգիռ կողմերի հետ խորհրդակցություններ կանցկացնի և կմոբիլիզացնի քաղաքական, ֆինանսական և այլ գործիքները կոնֆլիկտների լուծման նպատակով: Կուզեի, որ ԵԱՀԿ-ն ավելի կարևոր դեր խաղար Հարավային Կովկասում»: