Գործարար Սիլվա Համբարձումյանի և Սյունիքի մարզպետ Սուրիկ Խաչատրյանի միջև «Արմենիա-Մարիոթ» հյուրանոցում տեղի ունեցած միջադեպի փաստով հարուցված քրեական գործը կարճելու` Հատուկ քննչական ծառայության (ՀՔԾ) որոշման դեմ կին գործարարի առաջին բողոքը մերժվել է: Այս մասին տեղեկացնում է «Ազատություն» ռադիոկայանը:
Մարզպետն անցած տարվա նոյեմբերի 14-ին հյուրանոցի նախասրահում հարվածել էր Սիլվա Համբարձումյանին, սակայն «ծեծի» հատկանիշներով հարուցված քրեական գործը ՀՔԾ-ն մեկ ամիս անց կարճել էր` հիմնավորելով, որ Ս. Խաչատրյանը կնոջը, ճիշտ է, մեկ անգամ ձեռքով հարվածել է, բայց դա ավելի շատ հրելու է նման, քան ծեծի, քանի որ քրեական իրավունքի տեսությունում «ծեծել» ասելով հասկացվում է ֆիզիկական ցավ պատճառելուն ուղղված բազմաթիվ հարվածներ հասցնելը:
Այս հիմնավորումից և նախաքննության օբյեկտիվությունից դժգոհ` Ս. Համբարձումյանի փաստաբան Կարեն Թունյանը բողոք էր ներկայացրել Հայաստանի գլխավոր դատախազ Աղվան Հովսեփյանի անունով։
Գլխավոր դատախազը բողոքը վերահասցեագրել է գործի նախաքննության նկատմամբ վերահսկողություն իրականացնող դատախազին, վերջինս էլ եզրակացրել է, որ նորմալ քննություն է ընթացել, որոշումը օբյեկտիվ է, Ս. Համբարձումյանի բողոքն էլ` անհիմն։
Կ. Թունյանն «Ազատություն» ռադիոկայանի հետ զրույցում փոխանցել է, որ նախաքննական մարմինը հրաժարվում է իրեն տրամադրել մարզպետի, դեպքի ականատեսների ցուցմունքների պատճենները, ինչպես նաևտեսագրության պատճենը, որպեսզի կարողանա համադրել ու համեմատել դրանք։
Բայց ընդամենը մեկ անգամ հնարավորություն ստանալով դրանք ընթերցել ու դիտել` փաստաբանը համոզվել է, որ «շատ մակերեսորեն է քննությունը կատարված»: «Որոշման մեջ, մասնավորապես, նշված էր, թե դա հարված չի եղել, այլ հրոցանման ինչ-որ մի բան է եղել։ Ու երբ ես տեսա ձայնագրությունը, ես հասկացա, որ դա առնվազն անհեթեթություն է, թե դա հրոցի է նմանվել, որովհետև դա որ հարված էր և, ընդ որում, սաստիկ հարված էր` ինձ համար ակնհայտ էր»,- ասել է նա:
«Հարվածը, այնուամենայնիվ, բռնի գործողություն է և, իմ կարծիքով, քրեորեն դատապարտելի։ Հակառակ պարագայում`կարելի է ցանկացած մարդու հենց հիմա գնալ ապտակել և ասել` «ընդամենն ապտակեցինք», սկսած ամենաբարձր պաշտոնատարից, վերջացրած ամենաներքևի պաշտոնատարով կամ ցանկացած մարդու` ով ում ուզի կապտակի», – ընդգծել է Թունյանը` հավելելով. «Ամբողջ հարցն այն է, որ համառորեն մեզ մերժում են նյութերի պատճենները տրամադրել, ինչը, իմ կարծիքով, ապօրինի է և կատարվում է բացառապես մեկ նպատակով`որպեսզի Սիլվա Համբարձումյանի իրավունքները հնարավոր չլինի պաշտպանել»։
Փաստաբանը տեղեկացրել է, որ պատրաստվում է նոր բողոք ուղարկել գլխավոր դատախազ Աղվան Հովսեփյանին, իսկ մերժում ստանալու դեպքում դիմելու են դատարան:
Սիլվա Համբարձումյանը ևս ասել է, թե կասկած չունի, որ մարզպետի նկատմամբ իշխանությունների նման հանդուրժողականությունը պայմանավորված է առաջիկա ընտրություններով։
«Ես հասկացա, որ սպասում են` ընտրությունները վերջանան, որ իր հարցերը հետո ուրիշ տարբերակով լուծեն։ Ես այդպես կարծում եմ», – ասել է կին գործարարը։