The New York Times-ի հաղորդմամբ, ԱՄՆ իշխանությունները վերջին տասնամյակի ընթացքում թույլ են տվել, որ ամերիկյան ընկերությունները Իրանում աշխատեն միլիարդավոր դոլարներ: Այդ ընկերություններն աշխատել են նաև «ահաբեկչությանն» աջակցող մյուս երկրներում:
Թերթը նշում է մի շարք հայտնի ամերիկյան բանկերի, Kraft Food և Pepsi ընկերությունների անունները: Բացի այդ, հայտնի է դարձել, որ ԱՄՆ կառավարությունը տրամադրել է այդ երկրներում բիզնես վարելու մոտ 10 հազար արտոնագիր:
Այդ ընկերությունները զբաղվել են ծխախոտի, սպորտային սարքավորումների, շինանյութի առևտրով, ինչպես նաև մասնակցել են Իրանից Եվրոպա գազամուղի կառուցման տենդերի: Խոսվում է նաև, որ ամերիկյան ընկերությունները համագործակցել են այնպիսի ընկերությունների հետ, որոնք զենք և զինամթերք են վաճառել Իրանին:
The New York Times-ը հայտնում է, որ իր տնօրինության տակ բազմաթիվ նմանօրինակ փաստաթղթերի բազա կա, սակայն հրապարակել է ընդամենը 1%-ը: ԱՄՆ ֆինանսների նախարարությունն էլ դեմ է եղել այդպիսի հրապարակմանը:
