«Հայոց աշխարհ»-ը գրում է, որ դեռևս 2010 թվականին սկսված և հանրության, այդ թվում ճարտարապետների միահամուռ պայքարի շնորհիվ «Մոսկվա» կինոթատրոնի ամառային դահլիճի տեղում այլ շինություն չկառուցվեց, սակայն ամառային դահլիճը հիմա էլ նույն անմխիթար վիճակում է:
Բնականաբար պայքարի նպատակը ճարտարապետ Սպարտակ Կնդեղցյանի ստեղծած հետաքրքիր և ժամանակին ըմբոստ, ավանգարդիստական համարվող ստեղծագործությունը պարապ և կիսաքանդ թողնելը չէր, այլ այն երևանցիներին որպես բաց կինոթատրոն վերադարձնելը: Տարիներն անցնում են, այս ուղղությամբ ի՞նչ են մտածում պատկան կառույցները, սեփականատերը:
Պարզվում է, քաղաքային իշխանությունները «Մոսկվա» կինոթատրոնի ամառային դահլիճը մայրաքաղաքի հետաքրքիր ժամանցի վայրերից մեկը դարձնելու ուղղությամբ աշխատանքներ են տանում։ Մասնավորապես բանակցություններ են վարվում ներդրողների հետ այն երիտասարդական մշակույթի կենտրոն դարձնելու ուղղությամբ, այսինքն՝ նկատի են առնվում նրա երբեմնի գործառույթները:
