ԱՄՆ նախագահ Բարաք Օբամայի վարչակազմը կվերսկսի խաղաղության բանակցությունները «Թալիբան» շարժման ներկայացուցիչների հետ, եթե Աֆղանստանի նախագահ Համիդ Քարզայը պաշտոնապես օրհնի այդ բանակցությունները:
Նման հայտարարությամբ հանդես է եկել բարձրաստիճան պաշտոնայններից մեկը՝ հայտնելով նաև, որ գործընթացը կարող է սկսվել մի քանի շաբաթների ընթացքում:
Ամերիկացի բարձրաստիճան դիվանագետ Մարք Գրոսմանը, որը ապստամբ խմբի հետ մի քանի գաղտնի հանդիպումներ է ունեցել, մյուս շաբաթ կհանդիպի Քարզայի հետ` համոզվելու համար, որ վերջինս կողմ է բանակցություններին:
The Washington post-ի հաղորդմամբ՝ մեկ այլ պաշտոնյա, որի անունը չի նշվում, գաղտնի բանակցությունների մասին խոսելիս հայտնել է, որ եթե Քարզայը տա իր հավանությունը, ապա բանակցությունները նորից կսկսվեն:
Հիշեցնենք, որ ԱՄՆ-«Թալիբան» նախնական գործարքը, ըստ որի՝ հինգ աֆղան բանտարկյալներ Guantanamo Bay բանտից պետք է տեղափոխվեին Կատար, և ապստամբ խումբը պետք է դադարեցներ միջազգային ահաբեկչությունը, ընդհատվեց անցած տարի դեկտեմբերին, քանի որ Քարզայը չհամաձայնեց համագործակցել:
