Ռուսական Regnum լրատվական գործակալության փոխանցմամբ` ձերբակալության վտանգի տակ հայտնված՝ թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն երեկ հայտարարել է, որ հիմար է այն քաղաքական գործիչը, ով վախենում է բանտում հայտնվելուց.
«Ես ցանկանում եմ հունվարի 10-ը նշել՝ որպես «Լրագրողների օր», քանի որ այս երկրում գոյություն չունի ո՛չ մամուլ, ո՛չ էլ ժողովրդավարություն։ Շատ կարևոր է անկախ ԶԼՄ-ների առկայությունը։ ԶԼՄ-ներին ձայնից զրկելը նշանակում է ձայնից զրկել բոլորին։ Ձայնազուրկ ժողովրդավարությունը քողարկված բռնապետություն է։
Թուրքիայում ձերբակալված լրագրողների թիվը հասնում է 97-ի։ Նախորդ տարվա խորհրդարանական ընտրություններից հետո աճել է ձերբակալված լրագրողների թիվը։ Յուրաքանչյուր լրագրողի ձերբակալությունը բաց սպառնալիք է՝ ուղղված հասարակությանը։
Այժմ էլ ցանկանում են հաշվեհարդար տեսնել ինձ հետ։ Ես հիանալի տեղյակ եմ, թե որտեղ են ծնվում այդ խաղերը։ Ես չեմ վախենում ձեր դատարաններից ու դատախազներից։ Ես ժողովրդի ձեռքում եմ։ Հիմար է այն քաղաքական գործիչը, ով վախենում է բանտում հայտնվելուց։ Եթե իշխանությունները ցանկանում են ձերբակալության միջոցով ահաբեկել ինձ, ապա ես խղճում եմ նրանց։ Անգամ եթե դուք ինձ ուղարկեք կախաղան, ես կասեմ այն ամենը, ինչ գիտեմ»։
Քըլըչդարօղլուն անդրադարձել է նաև օրեր առաջ Թուրքիայի գլխավոր շտաբի նախկին (2008-2010) պետ, պաշտոնաթող գեներալ Իլքեր Բաշբուղի կալանավորմանը. «Ասում են, թե Բաշբուղն ահաբեկիչների ղեկավարն է, նա ստեղծել է ահաբեկիչների խմբավորում։ Այստեղ առկա է երկու տարբերակ. ա) վարչապետ Էրդողանն իմացել է, որ Բաշբուղը ահաբեկչական կազմակերպության ղեկավար է և ոչ մի բան չի ձեռնարկել այդ կապակցությամբ, ինչը հանցագործություն է, բ) հարգելի վարչապետը ոչինչ չի իմացել այդ մասին, ինչը կատարելապես ամոթալի է»։
