Բոլոր երկրներն էլ ունեն իրենց նպաստավոր միջավայրը, որտեղ արտիստները կարող են գործել տարբեր ժանրերում: Մեր Հայաստանն էլ է նպաստավոր միջավայր, իհարկե չմոռանանք, որ առաջին հերթին արվեստագետն իր համար պետք է ստեղծի այդ նպաստավոր պայմանը: «Առաջին լրատվական»-ի հետ զրույցում ասաց երգչուհի Նադեժդա Սարգսյանը` պատասխանելով այն հարցին` արդյոք մեր երկրում կա՞ն անհրաժեշտ պայմաններն արվեստագետի նորմալ կենսագործունեության համար:
Նրա խոսքով, եթե կա ցանկություն, ուրեմն կարելի է հասնել ամեն ինչի: Հարցին` ի՞նչ վիճակում է ներկայում հայկական երգարվեստը, հատկապես էստրադային ժանրը, երգչուհին պատասխանեց, որ որքան էլ զարմանալի է, սակայն այսօր, ցավոք, լռության մեջ է «մեր ժանրը»: «Համերգներ, միջոցառումներ չկան: Չեմ հասկանում` ինչո՞ւ է այդպես: Գուցե այստեղ իմ բացակայությունն էլ է խաղացել իր դերը: Տեղյակ չեմ, սակայն փաստ է, որ այսօր մեր երգիչները լռում են»,- նշեց նա: Ըստ նրա` լռության պատճառը երևի թե այն է, որ յուրաքանչյուր մարդ լռում է նորություն անելու համար, և թե դա է լռության պատճառը, ապա ինքը միայն ուրախ է:
«Ուրախ կլինեմ, որ դրանից հետո արդեն մի մեծ նորություն ունենան մեր երգիչները: Եթե լռության պատճառն այլ է, ուրեմն գնում ենք անկման ճանապարհով»,- ավելացրեց նա` ընդգծելով, որ Էմմիի դեպքում լռությունը պայմանավորված է նրանով, որ աշխատում են «նորությունների վրա, ու դրանք շուտով կհանձնվեն հանդիսատեսի դատին»:
