Նորամուտ տարվա hոգևոր և ազգային տոների առաջնեկ Սուրբ Ծննդի և Աստվածահայտնության տոնակատարությունը Վիրահայոց թեմում մեկնարկել է Թբիլիսիի Սուրբ Էջմիածին եկեղեցում թեմի հոգևոր առաջնորդ, գերաշնորհ Տ. Վազգեն եպիսկոպոս Միրզախանյանի մատուցած ճրագալույցի Սուրբ պատարագով, որին ներկա էին տեղի հայ համայնքի ղեկավար այրերը, մտավորականության ներկայացուցիչներ, պետական և հասարակական գործիչներ, հավատացյալներ:
Վիրահայոց հոգևոր թեմի առաջնորդը Սուրբ պատարագի ընթացքում ընթերցել է Ն.Ս.Օ.Տ.Տ. Գարեգին Բ Ամենայն հայոց կաթողիկոսի շնորհավորական ուղերձն Ամանորի և Սուրբծննդյան տոների առիթով:
Հունվարի 6-ի առավոտյան Թբիլիսիի առաջնորդանիստ Սուրբ Գևորգ եկեղեցու Սուրբ պատարագին ներկա գտնվելու և Թբիլիսիի հայ ազգաբնակչությանը շնորհավորելու էին եկել Վրաստանի խորհրդարանի փոխխոսնակ Գիգի Ծերեթելին, Թբիլիսիի Սակրեբուլոյի նախագահ Զաալ Սամադաշվիլին, Անվտանգության խորհրդի փոխքարտուղար Թամար Կինծուրաշվիլին:
Հավատացյալներին ուղղված իր խոսքում Սրբազան Հայրը շնորհավորանքի և երախտիքի խոսք է ուղղել նաև վրաց պաշտոնատար անձանց՝ այդ օրը Հայ Առաքելական եկեղեցի այցելելու և Քրիստոնեական տոները հայերի հետ միասին նշելու կապակցությամբ:
Թբիլիսիի և ողջ Վրաստանի հայ ազգաբնակչությանը եկեղեցական հոգեթով տոների առթիվ շնորհավորել են վրացի բարձրպաշտոնյա հյուրերը, որոնք գնահատելով թբիլիսահայության ներդրումն այս քաղաքի և այս երկրի բարգավաճման գործում, բարեմաղթանքի խոսքեր են ուղղել համայն հայությանը Ամանորի և Սուրբ Ծնունդի կապակցությամբ:
Սուրբ Ծնունդի և Աստվածահայտնության տոնակատարություններ եղան Սամցխե-Ջավախքի հայոց եկեղեցիներում, գլխավորությամբ առաջնորդական ընդհանուր փոխանորդ Բաբկեն Սալբիյանի:
Տոները նշվեցին նաև Բաթումիի և Քվեմո-Քարթլիի հայ համայնքներում:
Քրիստոսի Սուրբ Ծնունդով և հրաշափառ հայտնության հոգեպարար հույզերով և մեծ սիրով տոգորված հայ հավատացյալները մոմերով և օրհնված ջրով վերադարձան իրենց տները:
Հայարտուն, Թբիլիսի, 06.01.2012