«Աշխարհի խոհանոցը մեր սեղանին» շարքի հեղինակ Սոնյա Թաշչյանը խորհուրդ է տալիս, որ մեր ամանորի սեղաններին լինեն ավանդական կերակրատեսակներ. «Յուրաքանչյուր հայ կին պետք է անպայման տարեհաց պատրաստի` միջինքով (հոնի կորիզ կամ մետաղադրամ), որի վրա երկնային լուսատուներ պետք է պատկերված լինեն, որպեսզի հաջորդ տարի բերքը առատ լինի»:
Նա խորհուրդ տվեց պատրաստել նաև հարիսա, սուտ հարիսա, որն առանց մսի է լինում, ղափամա, պասուց տոլմա, անուշապուր կամ մայրամապուր. «Նաև կարելի է բազմատեսակ քաղցրեղեն պատրաստել. կաղանդ, որը հարած ընկույզ է հալած մեղրի մեջ, մեղրով, չամիչով, ծիրանաչրով և սալորաչրով արքայախնձոր»: Թաշչյանը կարծիք հայտնեց, որ հայ կանայք ինչ էլ պատրաստեն, անպայման ուշադրություն դարձնեն և՛ սննդի օգտակարությանը, և՛ ընտանեկան բյուջեին, ու չպատարաստեն մեծ քանակությամբ ուտեստներ, որ երկու օր անց դեն նետեն: