«Իրաքում աճող կրոնական լարվածությունն արյան լճի է վերածել երկիրը». Էրդողան

Թուրքական Sabah թերթի փոխանցմամբ, Թուրքիայի վարչապետ Էրդողանն այսօր հանդիպելու է իր իրաքցի գործընկեր Նուրի Ալ-Մալիքիի հետ։ Երեկ Էրդողանն ընդունել է իր նորվեգացի գործընկեր Ժենս Ստոլտենբերգին, որի հետ կազմակերպված համատեղ մամլո ասուլիսի ժամանակ հայտարարել է, որ հունվարի 10-ին հանդիպելու է Իրաքի վարչապետի հետ։

Էրդողանն Իրաքի կապակցությամբ նշել է. «Իրաքում ընթացող իրադարձություններն անընդունելի են։ Դժբախտաբար, Իրաքում սկսել է աճել կրոնական լարվածությունը։ Այդ լարվածությունն Իրաքը վերածել է արյան լճի։ ԱՄՆ-ը մեծ սխալ գործեց, երբ Իրաքից դուրս բերեց սեփական զորքերը։ Ես այդ մասին զգուշացրել եմ ԱՄՆ նախագահին ու փոխնախագահին։

Իրաքում ժողովրդավարական ռեժիմի հաստատումը կպահանջի տարիներ։ Իրաքը կայուն պետության վերածվելու համար անհրաժեշտ էր, որ ամերիկյան զորքերը մնային այդ երկրում։ Թուրքիան՝ որպես հարևան երկիր, չի կարող անմասն մնալ Իրաքում ընթացող զարգացումների հետևանքներից»։

Էրդողանը հավելել է, որ Իրաքի խնդիրների լուծման հարցում մտադիր է ներգրավել նաև Իրանին։