Ինչպես հայտնի է, ավագ դպրոցներում աշխատող մանկավարժներն այլևս պարտադիր ունենալու են որակավորում և համապատասխան պատրաստվածություն: Դե իսկ հանրապետության դպրոցներում տնօրենների կողմից սկսված լավ ուսուցիչների «որսը», որ չգիտես ինչու զայրացնում է հայ մանկավարժների որոշ հատվածին, ակնհայտ է: Խնդիրն այստեղ, սակայն, այլ է: Այսօրվա դրությամբ որքան էլ որ հերքվում է, փաստ է, որ ավագ դպրոց են տարվում լավագույն մանկավարժները և միևնույն ժամանակ նույն այդ դպրոցների տնօրենները մոռանում են, որ իրենք գրագետ սերունդ պետք է ստանան հիմնական դպրոցից: Սա թերևս կապված է կրթության որակը բարեփոխելու մտադրության հետ, բայց եկեք համաձայնենք, որ ավագ դպրոց ստեղծել առանց լավ հիմնական դպրոցի անհնար է:
«Այսօրվա 11-րդ դասարանն ավարտող աշակերտների մեծ մասը չգիտի ավելին, քան իմացել է 4-րդ դասարանում (եթե որոշ բաներ չի մոռացել): Հիմնականից ուժեղներին ավագ բերելը շատ սխալ է: Ինձ թվում է, որ ուսուցիչների մեջ առաջանում է շերտավորում` «լավագույն ուսուցիչներ», որոնք պիտի աշխատեն ավագ դպրոցում և հիմնական դպրոցի ուսուցիչներ, որոնց աշխատանքը մնում է ստվերում»,- ասում է այժմ հիմնական դպրոցում աշխատող ֆիզիկայի մասնագետ Կիմա Կարապետյանը:
«Ցավալի է, եթե իսկապես նման շերտավորում կա, դա պարզապես մեծ ցանկությունն է, որ ավագ դպրոցն ստացվի: Այո, ավագ դպրոցը պետք է ունենա լավագույն ուսուցիչներ, բայց կարծում եմ, որ առաջին հերթին պետք է կարևորել հիմնական դպրոցը. մանկավարժների ընդունելությունը նոր օրենքով պետք է լինի մրցութային հիմունքներով, որը վերապահված է դպրոցներին և պետականորեն սահմանված է ատեստավորման գործընթաց: Սա էլ որոշակի զտման հնարավորություն կտա», – ասում է ՄԿՈՒԶԱԿ-ի տնօրեն Մարինե Հակոբյանը: Իսկ ԿԳՆ Հանրակրթության վարչության պետ Նարինե Հովհաննսիյանը նշում է, որ հենց իրենք` ուսուցիչներն են մեծ մասամբ խուսափում ավագ դպրոցի պատասխանատվությունից: «Այսօր առաջինից մինչև 12-րդ դասարան մենք որակյալ ուսուցիչ ենք փնտրում: Գուցե այդ ուսուցիչները բավարար որակ չունեն, կամ պետք եղած չափով պատրաստ չեն աշխատելու», – ասում է վարչության պետը: