Ամերիկայում կատարված հետազոտության համաձայն` մաստակները, սպեղանիները, որոնք ծխողներին նիկոտին են տրամադրում, նրանց երկար ժամանակ չեն օգնում թողնել ծխելը:
Հարվարդի համալսարանի հանրային առողջության դպրոցի հետազոտության ընթացքում ուսումնասիրություն է անցկացվել Մասաչուսեթս նահանգի 787 մեծահասակների շրջանում, ովքեր վերջերս են թողել ծխելը, և պարզվել է, որ ժամանակի ընթացքում նրանց մեծամասնությունը նիկոտինի փոխարինման թերապիայից հետո նորից վերադարձել է այդ վատ սովորությանը:
Հետազոտության հեղինակ Հիլել Ալփերթն ասել է, որ այս հետազոտությունը ցույց է տալիս, որ նիկոտինի փոխարինման թերապիան (NRT) նույնքան անօգուտ է, որքան և ծխելը թողնելու ինքնուրույն միջոցները:
Ուսումնասիրության մասնակիցների շրջանում հարցումներ են անցկացվել երեք տարբեր ժամանակահատվածներում` 2001-2002, 2003-2004 և 2005-2006 թվականներին:
Ծխելը վերսկսողների թիվը, ըստ հետազոտության արդյունքների, նույնն էր ինչպես նիկոտինի փոխարինման թերապիան օգտագործողների, այնպես էլ չօգտագործողների շրջանում:
Ինչպես գրում է AFP-ն, հետազոտության ընթացքում նաև պարզվել է, որ նիկոտինից կախում ունեցող ծխողները, ովքեր անցել են նիկոտինի փոխարինման թերապիան առանց պրոֆեսիոնալ թերապիայի, կրկնակի անգամ ավելի հավանական է, որ կվերսկսեն ծխելը, քան նրանք, ովքեր չեն օգտագործել նիկոտինի փոխարինման թերապիան:
