Այսօր Վերաքննիչ դատարանն հետաձգել է ԶՈւ զինծառայող Վալերի Մուրադյանի սպանության գործի քննությունն իրականացնող քննիչների դեմ ներկայացված բողոքի քննությունը, քանի որ մեղադրող կողմը՝ դատախազ Հարություն Հարությունյանը չէր ներկայացել։
Հիշեցնենք, որ, ըստ պաշտոնական վարկածի, Վալերի Մուրադյանը 2010 թ. մարտի 15-ին ինքնասպան է եղել` պարանի միջոցով երկաթե ձողից կախվելով: Գործը կասեցվել է, իսկ 2011 թ. հունվարին տղայի մոր՝ Նանա Մուրադյանի բազմաթիվ բողոքներից հետո ՊՆ քննչական ծառայությանը հանձնարարվել է լրացուցիչ նախաքննություն իրականացնել: Նախաքննության վերսկսումից հետո կալանավորվել է զինծառայող, որը մեղադրվել է դեպքից մեկ ամիս առաջ Վ. Մուրադյանին ապտակելու և նվաստացնելու համար: Զինծառայողի նկատմամբ քրեական հետապնդումը դադարեցվել է ԱԺ համաներման մասին որոշման հիման վրա:
Նշենք, որ զինծառայողի սպանության կամ պաշտոնական վարկածով՝ ինքնասպանության գործի քննությունն իրականացրել է Ստեփանակերտից քննիչ Ապրեսյանը, և 4 ամիս անց գործի քննությունը հանձնվել է Արման Թամրազյանին։
