Մեզանում չափազանց տարածված մի երևույթ` դպրոցական ուսումնառության վերջին տարիներին բուհական ընդունելության համար նախատեսվող մասնագիտությունները կրկնուսույցների հետ պարապելը թվում էր, թե պետք է վերանար ավագ դպրոցների ներդրմամբ, սակայն այն, ինչպես պարզվում է, ոչ միայն չի վերանում, այլև շահում է հավելյալ ժամանակ: Այսպես, ծնողների գերակշիռ մասը չբավարարվելով դպրոցում իրենց երեխաների ստացած գիտելիքներով դիմում են կրկնուսույցներին՝ բուհական ընդունելության շրջանում մասնավոր պարապմունքների արդյունքում ակնկալելով բարձր գնահատականներ: Կրկնուսույցների մոտ մի քանի առարկայի ծանրաբեռնված ուսուցման հետևանքով սովորողները պատշաճ ուշադրություն չեն դարձնում դպրոցում ուսումնական պլանով նախատեսված մյուս առարկաներին, ինչպես նաև` հաճախակի բացակայում են դասերից, սակայն որ ամենակարևորն է ծնողի համար, մասնավոր դասուսույցները տալիս են սպասված արդյունքը: «Մասնավոր պարապմունքներով աշակերտը գիտելիք չի ստանում: Ես էլ այդ պարապողներից մեկն եմ: Մենք ընդամենը կատարում ենք ծնողի պատվերը, պատրաստում ենք ընդունելության քննությունների»,- ասում է տնային պայմաններում շուրջ 60 աշակերտի հետ անգլերեն պարապող Էլմիրա Վարդանյանը և հավելում. «Ի վերջո, ինչո՞ւ կա կրկնուսույցը, որովհետև ուսուցիչը լավ արդյունք չի տվել, և վստահություն չկա նրա տված որակի հանդեպ»: Շատ ուսուցիչներ գուցե չհամաձայնեն ասվածի հետ, սակայն մի բան պարզ է. եթե ուսուցիչները տային ցանկալի արդյունքը, ոչ մի ծնող ավել կոպեկ անգամ չէր ծախսի կրկնուսույցների վրա, մինչդեռ շատ ու շատ ծնողներ այսօր, հսկայական պարտքերի տակ ընկնելով, «պարապունքի» են տալիս իրենց երեխաներին:
«Չեմ կարծում, որ ավագ դպրոցի դասատուներն աշակերտների հետ կպարապեն այնպես, ինչպես անհատական պարապմունքերի ժամանակ»,- ասում է այս պահին իր երկու երեխաների պարապմունքների վրա ամսական 200 հազար դրամից ավելի ծախսող, մասնագիտությամբ հենց մանկավարժ տիկին Արփինեն: Նրա համոզմամբ` ծնողին պետք է լավ կրթություն դպրոցում և ոչ թե տնային հանձնարարություններ, ուզում է, որ երեխան դասը սովորած գա տուն, և ոչ թե ինքը տանը սովորեցնի երեխային:
ԿԳՆ հանրակրթության վարչության պետ Նարինե Հովհաննիսյանը նշում է, որ ավագ դպրոցն իսկապես նաև ենթադրում է կրկնուսույցների համակարգի վերացում, սակայն չի պարտադրում. «Կարևորն այն է, որ ոչ վճարունակ երեխան այսօր ավագ դպրոցի գիտելիքներով կարող է բուհ ընդունվել»,- վստահաբար ասում է վարչության պետը: