Աթենքի արվեստի ազգային պատկերասրահից գողացել են երկու նկար, որոնցից մեկը Պաբլո Պիկասոյի վրձնին է պատկանում: Ինչպես հայտնում է Lenta.ru-ն, գողությունը կատարվել է հունվարի 9-ի վաղ առավոտյան:
Ոստիկանության տվյալների համաձայն, հունվարի 9-ի վաղ առավոտյան թանգարանում գործել է ազդանշանային համակարգը: Թանգարանի պահակը ստուգումների ժամանակ նկատել է մի տղամարդու, որը դուրս է եկել թանգարանից: Դրանից հետո նա շրջել է թանգարանի սրահներով և հայտնաբերել երկու նկարի կորուստը:
Գողը (կամ գողերը) մտադիր էր գողանալ նաև երրորդ կտավը, սակայն շտապել է և չի հասցրել այն դուրս բերել շրջանակից: Նախնական ստուգումներից հետո պարզվել է, որ գողը թանգարան է մտել թանգարանի հետևի պատշգամբից:
Նախնական տվյալների համաձայն՝ գողացված նկարները չափազանց արժեքավոր են: Ոստիկանությունում չեն հայտնել, թե ինչ նկարներ են գողացվել: Այն, որ երկու նկարից մեկը Պիկասոյինն է, հունական տեղեկատվական գործակալությանը հայտնել են թանգարանի ներկայացուցիչները, սակայն չեն նշել նկարի անունը:
Համաձայն Արվեստի ազգային թանգարանի կատալոգի՝ թանգարանի հավաքածուում Պիկասոյի միայն մեկ նկար կա` «Կնոջ գլուխը» (1939 թիվ): Կատալոգում նշված է, որ այն թնագարանին է նվիրել նկարիչը:
