Մեծ Բրիտանիայի կառավարությունը մտադիր է Շոտլանդիային հնարավորությունը տալ անկախության հանրաքվե անցկացնել մինչև 2013 թվականի ամառը: Ինչպես հայտնում է The Independent-ը, մոտ ժամանակներս համապատասխան հայտարարություն պետք է անի վարչապետ Դևիդ Քեմերոնը:
Պարբերականի տվյալների համաձայն՝ հանրաքվեի անցկացման ժամկետը պաշտոնական Լոնդոնի հիմնական պայմանն էր: Ավելի վաղ իշխող Շոտլանդական ազգային կուսակցության (SNP) առաջնորդ Ալեքս Սելմոնդը հայտարարել է, որ մտադիր է հանրաքվե անցկացնել 2014 թվականի աշնանը` Շոտլանդիայում երկու խոշոր սպարտային միջոցառումների` Համագործակցության խաղերի և Ռայդերի գավաթի ավարտից հետո:
Ինչպես նշում է BBC News-ը, եթե Սելմոնդի կառավարությունը չհամաձայնվի Քեմերոնի առաջարկած պայմանին, Լոնդոնը կարող է չճանաչել հանրաքվեի արդյունքները:
Քեմերոնին աջակցել է բրիտանկան գանձապետարանի ղեկավար Դենի Ալեքսանդերը: Նրա խոսքերով՝ հանրաքվեի հետաձգումը բացասաբար է անդրադառնալու Շոտլանդիայի բարեկեցության վրա: Շոտլանդիայի կառավարույթան առաջին նախարարը` Ալեքս Սելմոնդը, իր հերթին հայտարարել է, որ հանրաքվեի հարցի որոշումը Շոտլանդիայի ազգային իշխանությունների իրավասությունն է:
Սելմոնդի կարծիքով՝ Շոտլանդիային անկախություն շնորհելը լավ է անդրադառնալու տարածաշրջանի տնտեսության վրա: Մասնավորապես, Շոտլանդիան կարող է ինքնուրույն հարկեր սահմանել և տնօրինել Հյուսիսային ծովի նավթի պաշարները: Այս որոշման դեմ են արտայատվել Շոտլանդիայի Լեյբորիստական, Լիբերալ-դեմոկրատական և Պահպանողական կուսակցությունները:
