Երեկ Ստամբուլում կայացել է Տնտեսական համագործակցության կազմակերպության գագաթնաժողովը, որին մասնակցել է նաև Ադրբեջանի նախագահ Իլհամ Ալիևը։ Նա հանդես է եկել ծավալուն ելույթով:
Ալիևը մասնավորապես նշել է, որ մեծ նշանակություն է տալիս Տնտեսական համագործակցության կազմակերպությանը և համոզմունք է հայտնել, որ հետագայում կազմակերպությունը համաշխարհային կարևոր դերակատարություն կունենա: Ադրբեջանի նախագահը հավաստիացրել է, որ Ադրբեջանի համար շատ մեծ նշանակություն ունի տարածաշրջանային համագործակցությունը. «Մենք ջանքեր են գործադրում տարածաշրջանային գործընթացների զարգացման ուղղությամբ: Կոնկրետ ծրագրերի իրականցման, ինչպես տրանսպորտային, այնպես էլ էներգետիկ, տարածաշրջանում նոր իրավիճակ է ստեղծվել, և Ադրբեջանը փորձում է մոբիլիզացնել տնտեսական հնարավարությունները առավել մեծ համագործակցությանը նպաստելու նպատակով»:
Ներկայացնելով Ադրբեջանի տնտեսական զարգացման ցուցանիշները, տրանսպորտային, էներգետիկ ծրագրերում Ադրբեջանի մասնակցությունը` Իլհամ Ալիևը չի շրջանցել ղարաբաղյան հակամարտության կարգավորման թեման: Նա նշել է, որ տնտեսական-ենթակառուցվածքային ծրագրերը իրագործելու համար տարածաշրջանում անհրաժեշտ է կայունություն, խաղաղություն և անվտանգություն. «Ցավոք, մեր երկրներում գոյություն ունեցող հակամարտությունները վտանգ են ներկայացնում մեր ցանկություններին հասնելու համար: Հաջող քաղաքական և տնտեսական զարգացումը հնարավոր է կայունության պայմաններում: Ադրբեջանում արդեն վաղուց է քաղաքական կայունություն հաստատվել: Սակայն չկարգավորված հակամարտությունները, Հայաստանի կողմից Ադրբեջանի տարածքի 20 տոկոսի գրավումը տարածաշրջանային բավականին մեծ սպառնալիքի օջախ են»,- նշել է Ադրբեջանի նախագահը` հիշատակելով միջազգային կազմակերպություններում ԼՂ խնդրի առնչությամբ ընդունված բանաձևերը. «Սակայն մենք իրականում չենք տեսնում տեղաշարժեր, և Ադրբեջանը տարիներ շարունակ տուժում է օկուպացիայի պատճառով: Մենք, իհարկե, չենք հաշտվում այս իրավիճակի հետ: Մենք կվերականգնենք մեր տարածքային ամբողջականությունը: Փորձում ենք լուծել խնդիրը խաղաղ բանակցությունների միջոցով: Ադրբեջանի տարածքային ամբողջականությունը ճանաչում են աշխարհի բոլոր երկրները, դա չի եղել և երբեք չի լինի քննարկման առարկա: Եթե հաշվի առնենք, որ այդ հակամարտությունը կարող էր չլինել, ապա, իհարկե, մեր պետության զարգացումը, ինչպես նաև տարածաշրջանային համագործակցության խնդիրները կարող էին հաջող և ինտենսիվորեն լուծվել»,- հայտարարել է Իլհամ Ալիևը:
