«Առաջին լրատվական»-ը դատական տեղեկատվական համակարգի պաշտոնական կայքից տեղեկանում է, որ այսօր Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում տեղի կունենա Հայաստանի ճանապարհային ոստիկանության նախկին պետ Մարգար Օհանյանի դատավարությունը: Դատը կսկսվի ժամը 11:30-ին:
Հիշեցնենք, որ Մարգար Օհանյանը մեղադրվում է Քրեական օրենսգրքի երկու հոդվածներով` պաշտոնեական դիրքը չարաշահելու եւ առանձնապես խոշոր չափի յուրացում կատարելու մեջ։ Ըստ մեղադրանքի, Ճանապարհային ոստիկանության նախկին պետը յուրացրել է մարզային ճանապարհային ոստիկանությանը հատկացված բենզինի զգալի մասը` պետությանը պատճառելով խոշոր չափի վնասներ։
Նախաքննությամբ ձեռք բերված ապացույցների համաձայն` պատճառված վնասը կազմել է մոտ 217 միլիոն դրամ (շուրջ 571 հազար դոլար), որից նախաքննության փուլում վերականգնվել է 198 միլիոնը։
Բենզինի յուրացման գործով, Մարգար Օհանյանից բացի, մեղադրանք է առաջադրվել Ճանապարհային ոստիկանության ևս երեք աշխատակիցների, այդ թվում` տնտեսական բաժանմունքի պետ Արա Լեւոնյանին, տեխնիկ Սամվել Մախմուրյանին և 2-րդ սպայական գումարտակի հրամանատար Ստեփան Կարախանյանին։ Վերջինիս ցուցմունքների հիման վրա էլ կալանավորվել է Մարգար Օհանյանը։
Հիշեցնենք, որ Մարգար Օհանյանը անազատության մեջ է օգոստոսի 30-ից։
