Մալայզիայի դատարանը անմեղ է ճանաչել ընդդիմադիր քաղաքական գործչին` Անվար Իբրահիմին, որին մեղադրում էին հոմոսեքսուալիզմի մեջ: Այս մասին հայտնում է Associated Press գործակալությունը:
Իբրահիմի նկատմամբ դատական գործընթացը սկսվել էր 2008 թվականի կեսերից: Մեղադրանքները հիմնվում էին քաղաքական գործչի ենթադրյալ սեռական զոհերի, իր կուսակցության 26-ամյա աշխատակցի ցուցմունքների, ինչպես նաև ԴՆԹ անալիզի վրա: Դատարանի վերջնական եզրակացության մեջ նշվում է, որ հավաքված ապացույցները չեն կարող լիակատար վստահելի լինել:
France-Presse գործակալության փոխանցմամբ՝ գործընթացի ելքը բավական անսպասելի էր դիտորդների, ինչպես նաև հենց Իբրահիմի համար, որն իր նկատմամբ հետապնդումները կապում է Մալայզիայի կառավարության մտադրությունների հետ` մեղադրանքների միջոցով հեռացնել ընդդիմադիր քաղաքական վտանգը: Վերլուծաբանների կարծիքով՝ Իբրահիմի անմեղ ճանաչելը ընդդիմությանը հաջորդ խորհրդարանական ընտրություններում հաղթանակ տանելու մեծ շանսեր է տալիս:
Դատավճռից հետո Իբրահիը իր գոհունակությունն է հայտնել դատարանի որոշման համար և հայտարարել է, որ մտադիր է ընտրություններում հաղթանակ տանել և «տապալել կոռումպացված իշխանությունը»: Մալայզիայի վարչապետ Նաջիբ Ռազակը իր հերթին նշել է, որ այս դեպքը ցույց է տալիս երկրի դատական համակարգի՝ գործադիր իշխանությունից անկախ լինելը:
Այս վճռից հետո Մալայզիայի մայրաքաղաք Կուալա Լումպուրայում` դատարանի շենքի մոտ, տեղի է ունեցել պայթյուն, որի հետևանքով տուժել է երկու մարդ: Պայթուցիկ սարքի ուժգնությունը մեծ չի եղել, այդ պատճառով հնարավոր է եղել խուսափել զոհերից և փլուզումներից: