Ամուսնու ընտանիքի կողմից բռնության ենթարված Մարիամ Գևորգյանը պատիվ է պահանջելու նախկին ամուսնուց՝ իրեն վարկաբեկելու համար: «Առաջին լրատվական»-ին այս մասին տեղեկացրեց Մարիամ Գևորգյանը`անդրադառնալով լրատվամիջոցներից մեկում հրապարակված ամուսնու`Դավիթ Զիրոյանի հարցազրույցին: Դավիթ Զիրոյանը նշել էր, որ Մարիամը թուղթուգիր է արել իրեն, թաքցրել է, որ մաշկային հիվանդություն ունի, իսկ Մարիամի այն մեղադրանքները, թե սկեսուրը արդուկով այրել է մեջքը, կրծքերը, ծրագրավորել է հենց Մարիամը, որպեսզի վերադառնա ընտանիք և արդարանա:
Մարիամի համոզմամբ, այդ հրապարակումը իր նախկին ամուսինն արել է իր և իր ծնողների արարքներին արդարացում տալու նպատակով: «Սուտ է, որ իմ ցուցմունքում ես ընդունել եմ, թե թուղթուգիր եմ արել իր ընտանիքին: Ես իմ ցուցմունքում դա չեմ ընդունել, դրան կանդրադառնամ հետագայում: Այնտեղ այնպիսի խոսակցություններ կան, որոնք իրականությանը չեն համապատասխանում: Թուղթուգրի պատմությունը եղել է իմ Հայաստան վերադառնալուց երկու շաբաթ առաջ, իրենց են ցանկանում արդարացնել»,- նշեց Մարիամ Գևորգյանը`հավելելով, որ ինքը կարող է ապացուցել, թե ինչպես է սկեսուրը իր նկարը տարել բախտագուշակի մոտ:
Դավիթ Զիրոյանը Մարիամին նաև մեղադրել էր մաշկային հիվանդություն ունենալը թաքցնելու մեջ, սակայն Մարիամն ասաց, որ այդպիսի հիվանդություն չունի: Նրա մաշկը պարզապես յուղոտ է, և հաճախ են սկսվում ալերգիաներ: Դավիթ Զիրոյանի նախկին կինը նաև մեկնաբանեց այն նկատառումը, թե ինքը կարող էր փախչել այդ ընտանիքից, բայց չի արել:
«Ենթադրենք հնարավորություն եմ ունեցել փախչելու, բայց ո՞ւր գնայի: Այն մարդը, որը սթրեսի մեջ է ապրում, չի կարողանում ուղեղն աշխատեցնել և հասկանալ, թե ինչ կարող է անել: Նրանք պարզապես իրենց են փորձում արդարացնել: Մեր ընտանիքը, մասնավորապես՝ հայրս ասել է, որ գումար կուղարկի, որպեսզի նրանք ինձ ուղարկեն տուն, բայց խաբել ասել են, իբրև թե ես հղի եմ և ի վիճակի չեմ ինքնաթիռ նստել: Ես մի բան կասեմ, որ իրենք իրենց ծիծաղելի դրության մեջ են գցում: Հղի չեմ եղել»,- պնդեց Մարիամ Գևորգյանը`հավելելով, որ նաև կհերքի իր նախկին ամուսնու այն բացահայտումը, թե իր հորեղբայրը ոստիկանության աշխատակից է եղել և իրեն սովորեցրել է իր իսկ մարմինն այրել ու ինքն իրեն խոշտանգել: Այս բոլոր մեղադրանքների համար Մարիամը պատիվ է պահանջելու, քանի որ գտնում է, որ չի կարելի այդքան սուտ տեղեկություն հաղորդել: Ըստ նրա` իր բոլոր մեղադրանքները եղել են օրենքի շրջանակում և փաստերով:
Հիշեցնենք, որ արդեն մի քանի ամիս է քրեական գործ է հարուցվել, որի շրջանակում մայիսին արդեն Ռուսաստանում կալանավորվել է Մարիամի սկեսուրը:
Տեղեկացնենք, որ Մարիամ Գևորգյանին ծնողները կնության էին տվել Դավիթ Զիրոյանին: Նրանք տեղափոխվել էին Սանկտ Պետերբուրգ, որտեղ լարված հարաբերություններ են ստեղծվել ընտանիքի և Մարիամի միջև: Այնուհետև Մարիամի նկատմամբ սկսվել են խոշտանգումները՝ դաժան ծեծեր, նվաստացումներ, հոգեբանական ճնշումներ: Այսօր Մարիամի մարմնի վրա դեռ դաջված են տաք արդուկի, պատառաքաղների հետքերը: Այժմ շարունակվում է նախաքննություն, որի գաղտնիությունից ելնելով, շատ մանրամասներ Մարիամը չհաղորդեց:
