Աստանայում կայանալիք ԵԱՀԿ գագաթնաժողովում չի ակնկալվում ԼՂ խնդրի շուրջ ճանապարհային քարտեզի ստորագրում, ըստ ադրբեջանական TREND գործակալության` հայտարարել է Ադրբեջանի արտգործնախարար Էլմար Մամեդյարովը` հավելելով, որ այժմ օրակարգում է բանակցային գործընթացի ձեւաչափի սահմանման հարցը:
Ղարաբաղյան հակամարտության կողմերը պետք է Լեռնային Ղարաբաղի հարցով բանակցությունների սեղանից հեռացնեն բացասական ասպեկտները, այսօր հայտարարել է Ադրբեջանի արտգործնախարար Էլմար Մամեդյարովը Բաքվում` ելույթ ունենալով «Հարավային Կովկասը փոփոխվող աշխարհում» գիտաժողովի բացմանը։ Որպես բացասական ասպեկտ՝ նա նշել է` «Ադրբեջանի գրավյալ տարածքներից զորքերը դուրս բերելու Հայաստանի ցանկության բացակայությունը, բռնի տեղահանվածների՝ Լեռնային Ղարաբաղ եւ հարակից տարածքներ վերադարձին Երեւանի խոչընդոտումը, Հայաստանի պահանջը՝ ներկա փուլում որոշելու ԼՂ-ի կարգավիճակը, որ այժմ անհնար է»։ «Ղարաբաղյան հակամարտությունը լուրջ սպառնալիք է ստեղծում տարածաշրջանի զարգացման եւ այստեղ ապրող ժողովուրդների համար։ Մենք հասկանում ենք, որ առկա մի քանի չափազանց խնդրահարույց խնդիրներում հակամարտության կողմերի միջև ներկայումս համաձայնության հասնելը կարող է դառնալ լավ բազա՝ հակամարտության ամբողջական լուծմանն անցնելու համար»,- ասել է նա։ Մամեդյարովի խոսքերով, տարածաշրջանի երկրները պետք է ամեն ինչ անեն երկարատեւ խաղաղության եւ կայունության հասնելու համար։ «Այսօր բանակցային գործընթացում տարօրինակ իրավիճակ է ձեւավորվել, երբ ո՛չ Ադրբեջանը, ո՛չ ԵԱՀԿ Մինսկի խմբի համանախագահները չեն կարողանում ստանալ Մադրիդյան սկզբունքների առնչությամբ Հայաստանի կոնկրետ պատասխանը»,- ասել է նա։ Ադրբեջանցի նախարարի խոսքով, բանակցությունների կարեւոր ասպեկտ է դառնալու ԼՂ ադրբեջանական համայնքի ներկայացուցիչների վերադարձը Լեռնային Ղարաբաղ։ Մամեդյարովը նշել է, որ Ադրբեջանը մտադիր չէ հրաժարվել խաղաղ գործընթացից եւ կշարունակի վարել բանակցություններ, որոնք այժմ այդքան էլ ինտենսիվ չեն։ Նա հավելել է, թե Հայաստանը չպետք է արգելակի բանակցային գործընթացը։
Հոկտեմբերի 22-23-ն անցկացվող գիտաժողովին մասնակցում են ավելի քան 150 արտասահմանցի և տեղի փորձագետներ։