Չնայած երկարատև բողոքի ակցիաներին` Հայաստանի խորհրդարանը երեկ ընդունեց «Լեզվի մասին» օրենքում կատարված փոփոխությունների նախագիծը և դրանով իսկ հնարավորություն ստեղծեց մեր երկրում օտարալեզու դպրոցների գոյության համար: «Սարդարապատ» շարժման նախաձեռնող խմբի անդամ Հայկ Բալանյանը մեզ հետ զրույցում կարծիք հայտնեց, որ դա քաղաքական որոշում է. «Սա վերնախավի որոշումն է, որի նպատակն է ապահովել էլիտայի վերարտադրման մեխանիզմներ և առավելություն: Հայաստանում ստեղծված համակարգը հստակ բաժանում է ստեղծել իշխող փոքրամասնություն և ճորտեր»:
Բալանյանի գնահատմամբ, վերնախավը ցանկանում է կրթական մակարդակի առումով առավելություն ունենալ մյուսներից, իսկ քանի որ հայկական կրթական համակարգը չի ապահովում մրցունակ կրթություն և նպատակ էլ չունի, այդ մարդիկ որոշել են ստեղծել էլիտար դպրոցներ և արգելք սահմանել, որպեսզի ռամիկների երեխաները հնարավորություն չունենան սովորելու նման դպրոցներում և առաջընթաց ունենալու. «Ստեղծվում է մի համակարգ, որը այսօր կա Աֆրիկայում, երբ տեղական լեզուներով սովորում են տարրական դպրոցում, իսկ մասնագիտական, բարձրագույն կրթությունը իրականացվում է անգլերեն կամ ֆրանսերեն: Նույն մոդելն է ընտրված նաև Հայաստանում և պատահական չէ, որ դրա հետևում կանգնած է Տիգրան Սարգսյանը, պատահական չէ, որ Դիլիջանում է»:
Բալանյանը կարծիք հայտնեց, որ այս օրենքի հետևանքները մենք տեսնելու ենք մոտ ապագայում, երբ Հայաստանում կբացվեն նաև թուրքական, պարսկական դպրոցները. «Հայաստանը դառնալու է ընտրախավի ապագա սերնդի թատերաբեմ, երբ ռամիկները խոսելու են հայերեն, իսկ վերնախավը` օտար լեզուներով: Այս ամենը կրթության և երկրի զարգացման հետ ընդհանրապես կապ չունի, սա կաստայական հարաբերություններ ձևավորելուն ուղղված ևս մեկ քայլ է»: